ՀՀ Պետեկամուտների կոմիտեն հրապարակել է Հայաստանի 2011թ. առաջին կիսամյակի խոշոր հարկատուների ցանկը։ Այն գլխավորում է «Զանգեզուրի պղնձամոլիբդենային կոմբինատը», որը միջազգային շուկաներում պղնձի և մոլիբդենի գների կայունացմամբ պայմանավորված վերականգնել է առաջատարի իր դիրքերը՝ այս տարվա առաջին կիսամյակում պետական բյուջե մուտքագրելով ավելի քան 15 մլրդ դրամ, ավելի քան 3.5 անգամ գերազանցում է նախորդ տարվա համապատասխան ժամանակահատվածի ցուցանիշը։
Ցանկի առաջատարը մեկական տեղով հետ է մղել նախորդ տարվա առաջատար եռյակին։ Այսպես, երկրորդ տեղում գտնվում է նախորդ տարվա առաջին կիսամյակի առաջատար «Հայռուսգազարդը» ընկերությունը՝ 12 մլրդ 700 մլն դրամ ցուցանիշով, որը ևս տարեկան կտրվածքով հարկերի վճարման աճ է արձանագրել՝ 26.7%-ով:
Երրորդ տեղում գործարար-պատգամավոր Սամվել Ալեքսանյանին պատկանող «Ալեքս Գրիգ» ընկերությունն է՝ 8 մլրդ 100 մլն դրամ ցուցանիշով, ինչը 4.6%-ով զիջում է մեկ տարի առաջվա ցուցանիշին։
Առաջին 100 խոշորագույն հարկատուների մոտ նախորդ տարվա համեմատ աճը կազմել է 53.2% կամ 39 մլրդ 600 մլն դրամ այս տարի՝ նախորդ տարվա 25մլրդ 800 մլն դրամի համեմատ։ Ընդ որում, այս ցուցանիշը ավելին է, քան առաջին 1000 խոշոր հարկատուների մոտ:
