Business-Грузия-ի փոխանցմամբ՝ այս տարի Վրաստան այցելած զբոսաշրջիկների քանակն աճել է 45 տոկոսով։ Զբոսաշրջության ազգային գործակալության տվյալներով՝ 2011 թվականի հունվար-հուլիսին Վրաստան է այցելել 1,444,299 մարդ, ինչը 45 տոկոսով ավելին է՝ համեմատած նախորդ տարվա միևնույն ժամանակահատվածի հետ։
Այդ 7 ամիսների ընթացքում Եվրոպայից (բացառությամբ ԱՊՀ երկրների) Վրաստան է այցելել է 481,501 մարդ, ինչը կազմել է ողջ այցելուների 33.3 տոկոսը և 39 տոկոսով ավելին է՝ համեմատած նախորդ տարվա նույն ժամանակահատվածի հետ։
ԱՊՀ երկրների մասնաբաժինը կազմել է 62.1 տոկոս՝ 897,616 մարդ, ինչը 46 տոկոսով գերազանցում է նախորդ տարվա նույն ժամանակահատվածում գրանցված ցուցանիշը։
ԱՄՆ-ից Վրաստան է այցելել 15,360 մարդ, ինչը կազմում է ընդհանուր այցելուների 1.1 տոկոսը և 5 տոկոսով ավելին է՝ նախորդ տարվա նույն ժամանակահատվածի հետ համեմատ։
Ասիական երկրներին բաժին է ընկել օտարազգի հյուրերի միայն 3 տոկոսը՝ 42,917 մարդ (85 տոկոսանոց աճ՝ նախորդ տարվա նույն ժամանակահատվածի հետ համեմատ), իսկ աֆրիկյան երկրներին՝ ընդամենը 0.1 տոկոսը՝ 958 մարդ (82 տոկոսանոց աճ՝ նախորդ տարվա նույն ժամանակահատվածի հետ համեմատ)։ Աշխարհի մնացյալ վայրերից Վրաստան է ժամանել 5947 մարդ (0.4 տոկոս), ինչը 245 տոկոսով ավելին է՝ համեմատած նախորդ տարվա նույն ժամանակահատվածի հետ։
ԱՊՀ երկրներից Վրաստան ժամանած այցելուների ամենամեծ մասը բաժին է ընկնում Ադրբեջանին՝ 376,327 մարդ, ինչը 46 տոկոսով ավելին է՝ համեմատած նախորդ տարվա նույն ժամանակահատվածի հետ, մինչդեռ Հայաստանի դեպքում այդ նույն ցուցանիշները հետևյալն են. 336,326 մարդ և 43 տոկոսանոց աճ։
Հիշեցնենք, որ վրացական կողմի կանխատեսմամբ՝ այս տարի Վրաստան կայցելի 3 միլիոն օտարազգի զբոսաշրջիկ։
