Նոյեմբերի 27-ից մինչև դեկտեմբերի 1-ը ԱՄՆ-ի և Հարավային Կորեայի զորամիավորումները պատրաստվում են Կորեական թերակղզում անցկացնել զինվորական զորավարժություններ: Սա հարուցել է Հյուսիսային Կորեայի վրդովմունքը: Reuters գործակալությունը, հղում անելով Կորեայի կենտրոնական հեռագրային գործակալությանը, հաղորդում է, որ Հյուսիսային Կորեայի ղեկավարությունը զգուշացրել է, որ այդ զորավարժությունները կհանգեցնեն պատերազմի Կորեական թերակղզում: «Իրավիճակը Կորեական թերակղզում մոտենում է պատերազմականին` ռազմատենչ պետությունների իրականացվելիք զորավարժությունների պատճառով, որոնք ուղղված են Հյուսիսային Կորեայի դեմ»,- ասված է հաղորդագրության մեջ: Մենք արդեն տեղեկացրել ենք, որ դեպի Կորեական թերակղզի չորեքշաբթի առավոտյան շարժվել է ամերիկյան «Ձորջ Վաշինգտոն» ավիակիրը, որը Հարավային Կորեա է տանում 6 հազար զինվոր և 75 ինքնաթիռ: Այն դուրս է եկել ԱՄՆ ռազմաբազայից, որը գտնվում է ճապոնական Յոկոսուկա կղզւմ:
Այսօր Ճապոնիայի վարչապետ Նաոտո Կանը իր նախարարներին հրահանգել է զորավարժությունների օրերին չբացակայել երկրից, քանի որ վտանգ կա, որ իրավիճակը տարածաշրջանում կարող է սրվել Հյուսիսային Կորեայի հնարավոր անսպասելի արձագանքի պատճառով: Ճապոնիայի պաշտպանության նախարար Տոսիմի Կիտաձավան իր հերթին հայտարարել է, որ «տեղեկությունների հավաքման գործընթացը տեղի է ունենում շուրջօրյա ռեժիմով»` ինքնաթիռների և ռադարների միջոցով: Այս մասին հաղորդում են Риа-Новости-ն և CNN-ը:
