Pfizer ընկերությունը ստեղծել է հակավիրուսային դեղահաբ, որի շնորհիվ կորոնավիրուսով վարակված մարդու մոտ հնարավոր է կանխել հիվանդության խորացումը: Այս մասին հաղորդում է Daily Mail պարբերականը:
Դեղահաբի փորձարկումներին մասնակցում է շուրջ 60 մարդ: Փորձարկումների առաջին փուլը կավարտվի մայիսի 25-ին: Եթե դրանց արդյունքում պարզվի, որ դեղահաբն ապահով է, ապա հետագա փորձարկումներում կընդգրկվեն ավելի մեծ թվով մարդիկ, և դեղամիջոցը կարող է հասանելի լինել արդեն այս տարվա վերջին:
Ըստ լրատվամիջոցի՝ Մեծ Բրիտանիայի վարչապետ Բորիս Ջոնսոնն անցյալ շաբաթ հայտարարել էր, որ երկրի կառավարությունը հատուկ խումբ է ստեղծել, որի նպատակն է մինչև աշուն գտնել և ձեռք բերել հակավիրուսային դեղամիջոցներ, որոնց շնորհիվ հնարավոր կլինի կորոնավիրուսը բուժել տանը:
Ի դեպ, ամերիկա-գերմանական Pfizer և BioNTech ընկերությունների համատեղ ստեղծած հակակորոնավիրուսային պատվաստանյութերը լայնորեն կիրառվում են Եվրոպայում և Հյուսիսային Ամերիկայում:
