Ուրուգվայը, որպես Հայոց ցեղասպանությունն առաջինը ճանաչած երկիր, մշտապես վերահաստատում է իր դիրքորոշումն այդ հարցում՝ աջակցություն հայտնելով հայ ժողովրդին: «Արմենպրես»-ին տրամադրած տեսաուղերձում այս մասին ասել է Ուրուգվայի Արևելյան Հանրապետության փոխնախագահ, Գլխավոր ժողովի նախագահ Բեատրիս Արխիմոնը:
«Այս տարի, ցավոք, Ուրուգվայի խորհրդարանը չի կարողանա ոգեկոչել մեզ համախմբող այդ շատ յուրահատուկ տարելիցը, որը կապված է Ուրուգվայի համար հատուկ նշանակություն ունեցող Հայ դատի հետ: Ուրուգվայը, որպես ցեղասպանությունը ճանաչած երկիր, մշտապես վերահաստատում է իր վերաբերմունքը, ինչը դարձել է պետական քաղաքականություն. հիշատակվում է մեր խորհրդարանի կողմից ամեն տարի, մեր երկրի ողջ հայկական համայնքի անդամների հետ: Մի համայնք, որի ներկայացուցիչները մշտապես ակտիվ են եղել որպես Ուրուգվայի քաղաքացիներ, և ովքեր շարունակաբար նույնականացվել են Հայ դատի հետ: Մենք արդարացնում ենք այս դատը՝ որպես Ուրուգվայի պետական քաղաքականության խորհրդանիշ: Այսպիսով, այս տարի, այս շատ տարբեր աշխարհը մեզ ստիպում է շփվել էկրանների միջոցով, մեզ մղում է ձեզ ուղղել այս ուղերձը, վերահաստատել մեր պատմական դիրքորոշումը և իմացեք, որ, ինչպես միշտ, կարող եք ակնկալել մեր օժանդակությունը: Մեծ գրկախառնություն ողջ հայ համայնքին»,- ասված է տեսաուղերձում:
Օսմանյան կայսրության կողմից 1915թ. հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն է: Աշխարհասփյուռ հայությունը նշում է Հայոց ցեղասպանության 106-րդ տարելիցը: Ցեղասպանությունը ճանաչել և դատապարտել են մոտ երեք տասնյակ պետություն՝ Ուրուգվայը, Արգենտինան, Ավստրիան, Բելգիան, Բոլիվիան, Բրազիլիան, Կանադան, Չիլին, Կիպրոսը, Չեխիան, Դանիան, Գերմանիան, Հունաստանը, Իտալիան, Լիտվան, Լյուքսեմբուրգը, Նիդերլանդները, Պարագվայը, Լեհաստանը, Պորտուգալիան, Ռումինիան, Ռուսաստանը, Սիրիան, Սլովակիան, Իսպանիան, Շվեդիան, Շվեյցարիան, Ֆրանսիան, միջազգային հեղինակավոր կազմակերպություններ:
