Դա Ադրբեջանի ապակառուցողական կամ թշնամական վարքի հերթական դրսևորումն է. մեզ համար լայն առումով անակնկալ չի, որ նմանատիպ սադրանքներ Ադրբեջանի կողմից լինում են: Այս մասին «Առաջին լրատվական»-ի հետ զրույցում նշեց Արցախի Հանրապետության նախագահի աշխատակազմի ղեկավար Արտակ Բեգլարյանը՝ անդրադառնալով վերջին օրերին Ադրբեջանի կողմից սահմաններին հնչող կրակոցներին:
«Սա նաև ցույց է տալիս, որ քաղաքացիական օբյեկտները հատուկ թիրախվորման տակ են: Բարեբախտաբար որևէ մարդկային կորուստ, վնաս չկա, և չեմ էլ կարծում, թե այդպիսի նպատակ ունեցել են: Ավելի շատ նպատակ ունեն ցույց տալու, որ տվյալ հատվածներում կամ ընդհանրապես Արցախում անվտանգ չէ, որ մարդիկ խուճապի մատնվեն, Արցախում ապրելու և երկարաժամկետ կյանք կառուցելու տեսանկյունից իրենց որոշումները փոխեն, սակայն ի հեճուկս դրա մենք պետք է առավելագույնս անենք, մեր անվտանգության համակարգը բարելավելու և երկարաժամկետ Արցախի զարգացման, հզորացման ուղղությամբ աշխատելու, այլապես կկորցնենք Արցախը, ինչը հենց Ադրբեջանի և Թուրքիայի ցանկությունն է»,-ասաց նա:
