«Պատերազմի ամենաթեժ պահերին դավադիր ուժերը խրամատ էին փորում իշխանության թիկունքում, որ պատերազմի ավարտից հետո մեր ազգային ողբերգությունը դարձնեին խաղաքարտ և համարձակվեին ձեռնոց նետել մեզ»,- ԱԺ նիստում ասաց «Իմ քայլը» խմբակցության պատգամավոր Նազելի Բաղդասարյանը։
«Եվ ովքեր էին դա անում, քաղաքական աղբանոցում հայտնված ուժերը։ Այն մարդիկ, որոնք տասնամյակով երկիր են կառավարել, բայց մնացել են անհայրենիք, որոնք համարձակվում են սեփական պետությանը մեղադրել պատերազմ հրահրելու մեջ։ Ո՞վ եք դուք, ձեզ ժողովուրդը գնահատական տվել է, տալու է, և դուք դա կտեսնեք»,- ասաց Նազելի Բաղդասարյանը։
Ըստ նրա՝ պատերազմից հետո գործի դրվեցին կեղծ թեզեր, որոնք արագ տեղ էին գտնում ադրբեջանական քարոզչամեքենայում՝ հարվածի տակ դնելով մեր երկրի ռազմաքաղաքական ղեկավարությանը։ «Ինչո՞ւ, որովհետև այս մարդիկ հայրենիք չունեն, որովհետև այս մարդիկ չեն հասկանում ինչ է պետականությունը, որովհետև իրենց համար իշխանության գալը, իշխանությունը բռնազավթելը միայն օրվա հրամայական է։ Չի լինելու դա։ Մեր հերոսները չեն զոհվել նրա համար, որ մենք այսօր կարողանանք հայրենիքը դնել նժարին և փորձենք սակարկել այն։ Վստահ եղեք, որ մենք այսօր իշխանություն պահելու մոլուցքով լցված չենք, մենք այսօր հայրենիքն ենք պահում նրանց ճիրաններից, որոնք տասնամյակներով վաճառել են ու խեղել մեր երիտասարդների ճակատագիրը»,- հայտարարեց պատգամավորը։