«Առաջին լրատվական»-ի զրուցակիցն է Կապան համայնքի ղեկավար Գևորգ Փարսյանը։
– Պարոն Փարսյան, «Չաարատ Կապան» ՓԲԸ-ի, Կապանի լեռնահարստացման նախկին կոմբինատի մոտ 400 աշխատակիցներ հրաժարվել են հանք մտնել և գործադուլ են անում, պահանջում աշխատավարձի բարձրացում: Խնդրին ծանո՞թ եք և արդյոք միջամտո՞ւմ եք խնդրի լուծմանը:
– Տեղյակ եմ այդ ամենից: Հարցին լուծում տրվել է, աշխատակիցները անցել են աշխատանքի: Տարբեր խնդիրներ կային՝ սկսած աշխատանքային անվտանգությունից, աշխատավարձով վերջացրած: Գլխավոր տնօրենը հանդիպել է աշխատակիցներին, ուսումնասիրել բոլոր հարցերը, և այդ հարցերին հերթականությամբ լուծում է տրվում: Երեկվանից աշխատակիցներն անցել են աշխատանքի:
– Աշխատանքային անվտանգության խնդիրը պատերազմից հետո՞ է առաջացել:
– Ոչ: Ընդհանրապես դրա հետ կապված չէ:
– Պարոն Փարսյան, մասնակցելո՞ւ եք արդյոք արտահերթ ընտրություններին նախկին մարզպետ Վահե Հակոբյանի հետ, թե՞ ոչ:
– Ընդհանրապես քաղաքականության հետ կապված հարցերը հետագայում:
– Կապանում առկա խնդիրները Ադրբեջանին անցած հողատարածքների հետ կապված քննարկվո՞ւմ են արդյոք, ի՞նչ լուծումներ կան:
-Ունենք շատ բնակիչներ, որոնք ունեն սեփականության վկայականներ, բայց նրանց հողատարածքներն անցել են Ադրբեջանին: Մենք հարցերը բարձրաձայնում ենք, քննարկում են ՄԻՊ Արման Թաթոյանի հետ, նա շատ ակտիվ զբաղվում է այդ բոլոր հարցերով:
– Իշխանությանը դիմե՞լ եք այդ հարցով: Ի՞նչ քայլեր է իշխանությունն անում:
– Այո՛, դիմել ենք, բայց անպատասխան:
– Ինչո՞վ է պայմանավորված:
– Ես դա չեմ կարող ասել, հարցրեք նրանց, թե ինչու հարցերը չեն լուծվում:
– Կապանից գերիներ ունե՞ք արդյոք:
– Այո՛, իհարկե, այս պահի դրությամբ ունենք հինգ անհետ կորած, և ևս մեկը, որը ռազմագերի է: Ի դեպ, պետք է ասեմ, որ նա գերեվարված է մինչև նոյեմբերի 9-ը, և Ադրբեջանի ԱԳ նախարարի կողմից, թե իբրև մինչև նոյեմբերի 9-ը գերեվարված բոլոր անձինք վերադարձվել են, իրականությանը չի համապատասխանում: Այսինքն՝ մենք հստակ գիտենք, որ տվյալ անձն անհետ կորել է մարտական գործողությունների ժամանակ Ջաբրայիլի շրջանում մինչև նոյեմբերի 9-ը: Եվ մեր ունեցած տեղեկությունների համաձայն՝ նա ռազմագերի է:
– Իսկ ինչո՞ւ եք խուսափում քաղաքական հարցերին պատասխանելուց: Դուք մասնակցում էիք Վահե Հակոբյանի կուսակցության համագումարին:
– Իհարկե, ոչ, ես այնտեղ չեմ եղել, ես անկուսակցական եմ:
– Եվ չե՞ք պատրաստվում քաղաքական հայտ ներկայացնել…
– Քաղաքականության վերաբերյալ բոլոր հարցերին հետագայում: