Իտալիայի կառավարությունը որոշում է կայացրել, որով արգելվում է կրուիզային և բեռնարկղային նավերին անցնել Վենետիկի պատմական կենտրոնով, հաղորդում է Sky News հեռուստաալիքը:
Իտալիայի կառավարությունը նման որոշում է կայացրել տեղի տեսարանները և բնությունը պահպանելու անհրաժեշտությունից դրդված: Կրուիզային և բեռնարկղային նավերին, Վենետիկի կենտրոնի փոխարեն, առաջարկվում է կանգ առնել պատմական կենտրոնից դուրս՝ դեռ չկառուցված տերմինալում:
«Վերջին տարիներին Վենետիկի այցելուներին զարմացնում է, թե ինչպես են այդ հարյուրավոր մետր երկարությամբ և բնակելի շենքերի բարձրությամբ նավերն անցնում այդպիսի խոցելի վայրերով»,- ասել է Իտալիայի մշակույթի նախարար Դարիո Ֆրանչեսկինին:
Քանի դեռ տերմինալը, որն ունակ է ավելի քան 40000 տոննա ջրատարողությամբ նավեր ընդունել, չի կառուցվել՝ կրուիզային և բեռնարկղային նավերը կարող են կանգ առնել հարևան Մարգերա արդյունաբերական նավահանգստում: