Թվում էր, թե վերջին օրերի ինտրիգը պետք է հանգուցալուծվեր, բայց նախագահ Արմեն Սարգսյանը չստորագրեց Գլխավոր շտաբի պետ, գեներալ-գնդապետ Օնիկ Գասպարյանի պաշտոնից ազատելու վարչապետի միջնորդությունը։ Լուրեր տարածվեցին, որ վարչապետի հրամանագիրն արդեն գործում է, սակայն Գլխավոր շտաբը նոր հայտարարություն տարածեց, որտեղ նշվում է, որ Գլխավոր շտաբի պետ Օնիկ Գասպարյանը մինչև 8-օրյա ժամկետի լրանալը շարունակում է իր ծառայությունը հայրենիքին ու ժողովրդին, հանդիսանում է Զինված ուժերի բարձրագույն զինվորական հրամանատարը։
Արդյո՞ք սա բազմիմաստ ու տագնապալի արձագանք չէ․ «Առաջին լրատվական»-ի հարցին վերլուծաբան Հակոբ Բադալյանը պատասխանեց․ «Ընդհանուր առմամբ, նախագահի ստորագրելու դեպքում էլ երաշխիք չկար, որ իրավիճակը հանգուցալուծվում է, որովհետև պարզ չէր, թե նույն Գլխավոր շտաբը և դրան զուգահեռ արմատական ընդդիմությունը ինչպես էին օգտագործելու այդ հանգամանքը և ինչ քայլեր էին ձեռնարկելու՝ հաշվի առնելով իրենց դիրքորոշումը։
Սակայն այստեղ մենք տեսնում ենք տարբեր մեկնաբանություններ։ Մի մասն ասում է, որ այդ իրավունքի ուժով ուժի մեջ մտնելու տարբերակն այդքան էլ այդպես չէ, և Օնիկ Գասպարյանի պաշտոնանկությունը պետք է ունենա շատ հստակ հիմքեր ու հիմնավորում։ Եթե դա չկա, եթե վարչապետը չի ներկայացնում դրանք, ապա 5-ամյա պաշտոնավարումը մնում է ուժի մեջ։ Մենք գործ ունենք Հայաստանի մի Սահմանադրության հետ, որը գրվել է, թերևս, հենց այս նկատառումով, այսինքն՝ ենթակա է ամենատարբեր մեկնաբանությունների, ինչպես նաև թույլ է տալիս ընդհանուր օրենսդրական դաշտը ենթարկել ամենատարբեր մեկնաբանությունների՝ ըստ քաղաքական նպատակահարմարության ու հայեցողության։ Կարծում եմ՝ սա հենց նպատակային էլ արվել է»։
Մանրամասները՝ տեսանյութում։
