Իրավապաշտպան Նատալյա Մարտիրոսյանը, «Առաջին լրատվականի» հետ զրույցում խոսելով բանակում վերստին հաճախակիացած սպանությունների և ինքնասպանությունների մասին, նշեց, որ դրանք հիմնականում անպաշտպանվածության արդյունք են.
«Մարդ սպանելը այլևս հանցավոր երևույթ չի դիտվում։ Եթե համապատասխան պատիժ չեն ստանում մեղավորները, եթե երևույթը համապատասխան արձագանք չի գտնում ո՛չ հասարակության, ո՛չ էլ պատկան մարմինների կողմից, ստեղծվում է նման մթնոլորտ՝ մեկ-երկու հոգի ավել, մեկ-երկուսը՝ պակաս»։
Ն.Մարտիրոսյանը հայտնեց, որ մեզանում, անշուշտ, կա վերահսկողության պակաս, և ցանկացած ոչ մարդկային վերաբերմունք մեզ մոտ դառնում է կյանքի օրենք։
Խոսելով արտաքին թշնամու կողմից սպանվածների և բանակի ներսում կատարված սպանությունների մասին՝ իրավապաշտպանը նշեց. «Ցանկալի է, որ ո՛չ այս և ո՛չ այն դեպքում չլինեն սպանություններ, բայց եթե արտաքին հարաբերություններում դա ինչ-որ տեղ հասկանալի է, քանի որ ունենք չլուծված խնդիր, և բացառված չեն նման դեպքերը, ապա ներսում տեղի ունեցող սպանությունները ոչ մի պատասխան չեն գտնում։ Ինչո՞ւ պիտի լինեն նման երևույթներ և նույնիսկ աճեն։ Դա աննորմալ երևույթ է և խոսում է այն մասին, որ մեր հասարակությունը և բանակը հիվանդ են։ Սա ագրեսիայի բարձր մակարդակ է, որը նաև արտահայտվում է այս ձևով։ Սա բազմակողմանի խնդիր է։ Չկա վերահսկողություն, չկա կարգապահություն, իրավիճակը չի կանոնակարգվում և չի վերահսկվում, ինչը մեզ մոտ արդեն զանգվածային բնույթ է կրում։
Ուժեղի իրավունքը իրավունք է՝ ցանկացած բարձր դիրքում գտնվող անձնավորություն իր համար խնդիր չի տեսնում, որ ճնշի դիմացինի իրավունքները՝ ընդհուպ մինչև սպանություն»։
