Հայաստանում այրվող թերթաքարերի պաշարներն այնքան շատ չեն, որպեսզի դրանք շահագործվեն գազ ստանալու նպատակով. «Առաջին լրատվականի» հետ զրույցում նման գնահատական տվեց երկրաբանական գիտությունների թեկնածու Ռուբեն Յադոյանը՝ մեկնաբանելով օրերս ՀՀ կառավարության և հանքային, գազային և նավթային ոլորտում մասնագիտացած ամերիկյան «International Minerals & Mines Limited» կազմակերպության միջև փոխըմբռնման հուշագրի կնքման փաստը:
Հուշագրի շրջանակներում նախատեսվում է տեխնիկական ուսումնասիրություններ կատարել ՀՀ-ում ավանդական և ոչ-ավանդական էներգետիկ ռեսուրսների արտադրական հզորությունների, տնտեսական վերլուծության, ռիսկերի, շահույթների և ներդրումների ներուժի վերաբերյալ, մշակել ներդրումային նախագծեր: Մասնավորապես, ԱՄՆ-ը մեծ փորձ ունի այրվող թերթաքարերից գազի և յուղի ստացման տեխնոլոգիաների կիրառման գործում:
Ռ.Յադոյանի խոսքով՝ ՀՀ-ում այրվող թերթաքարերի պաշարներ կան Տավուշի մարզում՝ Իջևանի և Դիլիջանի շրջաններում, Շիրակում, Ջաջուռում, Մեղրիում: Երկրաբանը հայտնեց, որ այրվող թերթաքարերի պաշարների շահագործման որոշ փորձեր կատարվել են 1990-ականներին Դիլիջանում և Իջևանում: Պաշարների ուսումնասիրությունը սկսվել է Խորհրդային տարիներին՝ 1950-ականներին, կատարվել են հետազոտություններ, սակայն պաշարների քիչ լինելու պատճառով դրանք դադարեցվել են:
Ռ.Յադոյանը նշեց, որ ՀՀ-ի այրվող թերթաքարերի պաշարները գնահատված են C2 կատեգորիայով (շահագործում են A-ի դեպքում):
