YouTube տեսահոսթինգը փորձարկում է նոր՝ Shorts գործառույթը, որը հարթակ է դիմանկարային ուղղվածությամբ նկարահանված կարճ տեսահոլովակների համար: Այս մասին հաղորդվում է Google-ի աջակցության ծառայության կայքում:
Նշվում է, որ YouTube Shorts-ը թույլ է տալիս հրապարակել մինչև 60 վայրկյան տևողությամբ կարճ ուղղահայաց տեսանյութեր, որոնք ցուցադրվում են ոչ միայն հեղինակների ալիքներում, այլ նաև YouTube-ի հիմնական էջի հատուկ բաժնում:
Մինչև 15 վայրկյան տևողությամբ տեսանյութեր ստեղծելու համար նախատեսված է հատուկ գործիք, որը թույլ է տալիս միավորել մի քանի կարճ ձայնագրություններ, դրանց երաժշտություն ավելացնել, փոխել վերարտադրության արագությունը և նկարահանման համար ժամանակաչափ տեղադրել:
Ընդգծվում է, որ գործառույթը բետա-թեստավորման փուլում է և հասանելի է ԱՄՆ-ի և Հնդկաստանի առանձին օգտատերերին:
Այս պահին օգտատերը, որին հասանելի չէ YouTube-ի նոր գործիքը, կարող է ներբեռնել մինչև մեկ րոպե տևողությամբ ուղղահայաց տեսանյութ, վերնագրի կամ նկարագրության մեջ ներառել #Shorts հեշթեգը և տեսանյութը կհայտնվի հատուկ բաժնում:
Ըստ լրատվամիջոցների հաղորդման, YouTube Shorts-ը հայտնի TikTok հավելվածի պատասխանն է: