Այսօր տեղի ունեցավ «Ազգային համագործակցություն» հիմնադրամի հոգաբարձուների խորհրդի առաջին նիստը:
«Մեր հիմնադրամի նպատակն այն է, որ պայմաններ ստեղծի բոլորի համար՝ անկախ բնակության վայրից, օգտվելու ինտերնետից և նորագույն տեխնոլոգիաներից։ Այս ցանցը պետք է օգնի հաղթահարել ՏՏ ոլորտում մեր հետ մնալը՝ համեմատած նույնիսկ տարածաշրջանի երկրների հետ»,- մեզ հետ զրույցում ասաց հիմնադրամի հոգաբարձուների խորհրդի անդամ Արշակ Սադոյանը։
Հիմնադրամը ստեղծելու գաղափարը առաջարկվել է մի քանի ՀԿ-ների կողմից և վերջապես այս տարի հավանության արժանացել կառավարության կողմից։ Հիմնադրամի ստեղծվելիք Ազգային համագործակցության ցանցը նախատեսում է անվճար 20,000 կայքեր տրամադրել ՀԿ-ների և փոքր ու միջին բիզնես ունեցող մարդկանց՝ իրենց աշխատանքը համացանցում ներկայացնելու համար, հատկացվելու են նաև կայքեր գյուղացիական տնտեսությունների, գյուղմթերքի սպառողների հետ առանց միջնորդի կապ ստեղծելու համար։ «Sociology.am կայքում ստեղծելու ենք նաև շտեմարան, որտեղ հայտնի հեղինակավոր մարդիկ կունենան իրենց էջերը»,- ծրագրերի մասին հայտնեց Արշակ Սադոյանը։
Հիմնադրամի հոգաբարձուների խորհրդի առաջին նիստին մասնակցում էր նաև ՀՀ էկոնոմիկայի նախարար Տիգրան Դավթյանը։ «Գլոբալացման գործընթացներից մենք իրավունք չունենք հետ մնալ»,- ողջունելով և կարևորելով հիմնադրամի ստեղծումը՝ ասաց նախարարը։
