ԱՄՆ գաղտնի ծառայությունը փնտրում է Պատվո շքանշանով պարգևատրված 22 ամերիկացի զինվորականների անձնական տվյալները գողացած ռուս հաքերին, գրում է Daily Beast պարբերականը՝ վկայակոչելով ԱՄՆ գաղտնի ծառայության հայտարարությունը:
Պարբերականի համաձայն՝ տվյալները գողացել են թանկարժեք ապրանքներ գնելու համար՝ ԱՄՆ Պաշտպանության նախարարության կողմից ղեկավարվող մանրածախ խանութների ցանցի միջոցով: Ինչպես նշված է, կիբերհարձակման արդյունքում չարագործը մոտ 55,000 ԱՄՆ դոլարի ապրանք է գնել:
ԱՄՆ գաղտնի ծառայությունը պնդում է, որ գնված ապրանքներն ուղարկվել են ԱՄՆ-ի 20 տարբեր հասցեներով, իսկ հետո ծանրոցներն ուղարկվել են Ռուսաստան:
Պարբերականի տվյալներով, հաքերը դիմել է միջնորդների ծառայություններին`ծանրոցները տարբեր հասցեներով հասցնելու համար: «Սուրհանդակներից» մեկը պարզաբանել է, որ «չի իմացել այն անձի անունը, ում համար աշխատել է», իր «պաշտոնական» պարտականությունների շարքում ծանրոցներ ստանալն ու ապրանքներն այլ հասցեներով ուղարկելն է եղել՝ ինչպես Ռուսաստանում, այնպես էլ ԱՄՆ-ի ներսում:
