Ռուս դիզայներ Վալենտին Յուդաշկինը «Դոժդ» հեռուստաալիքի հեռուստահաղորդավարուհի Նատալյա Սինդեևայի հետ զրույցում առաջին անգամ խոսել է իր հիվանդության մասին: Նա ասել է, որ մի քանի տարի է՝ պայքարում է քաղցկեղի դեմ:
Հինգ տարի առաջ դիզայները սկսել է գլխացավեր ունենալ՝ պատմել է նա: Սովորաբար Յուդաշկինը իր առողջական վիճակը ստուգում է Լոս Անջելեսում, բայց 2016-ին նա բաց էր թողել այցելությունը կլինիկա: Երբ ցավերը սկսել են սաստկանալ, դիզայներին խորհուրդ են տվել դիմել Բուրդենկոյի անվան կենտրոն: Հետազոտություններից հետո պարզվել է, որ դիզայները քաղցկեղ ունի:
«Սկզբում եղել է երիկամների քաղցկեղ. այն եղել է օջախը, հետո մետաստազներ են հայտնաբերել գլխում: Ըստ երևույթին, դա տեղի է ունեցել մեկ տարվա ընթացքում»,- խոստովանել է 57-ամյա մոդելավորողը հաղորդման եթերում:
Յուդաշկինը իրեն բուժող ակադեմիկոս Դավիդովին անվանել է իր երկրորդ հայր: Նա նշել է, որ իր հարազատները հանգիստ են արձագանքել իր հիվանդության մասին լուրերին, նա շարունակել է ստեղծագործել: Միևնույն ժամանակ, բուժման կուրսից հետո Յուդաշկինը սկսել է պարբերաբար զբաղվել իր առողջությամբ:
Նրա խոսքով՝ «նման պատմության միջով անցնողների» համար ամենադժվարը կրկին ստուգման գնալն է: Սակայն անհրաժեշտ է հասցնել ապրել, ինչ-որ բան անել, շեղվել և «նաև լավ տեսք ունենալ»՝ պարզաբանել է դիզայները:
«Դու քեզ պատրաստում ես բարոյապես և դրանից հետո ևս երեք ամիս մի փոքր օդ ես ստանում: Արդեն ապրում ես ոչ թե տարիներով, այլ այդպիսի եռամսյակներով»,- ամփոփել է Յուդաշկինը:
