«Առաջին լրատվականի» հետ զրույցում խոսելով 2008 թ.-ի ռուս-վրացական պատերազմի հետևանքներից, մասնավորապես, թե ինչ նշանակություն ունեցավ այն Հայաստանի համար կամ արդյոք արդարացվա՞ծ են վրացիների այն պնդումները, թե իրենց ձեռքին են Հայաստանի լծակները, Ռազմավարական և ազգային հետազոտությունների հայկական կենտրոնի (ՌԱՀՀԿ) փորձագետ Էդգար Վարդանյանը նշեց.
«Ներկայիս աշխարհում պետությունների միջև տարբեր տեսակի կապերը և շահերի փոխպայմանավորվածությունները այնքան սերտ են և խորը, որ ինչ-որ մի տեղ եթե ապակայունացման ինչ-որ գործընթաց է տեղի ունենում, ապա այն անպայման անդրադառնում է այլ պետությունների վրա և հատկապես այնպիսիների, որոնք այս կամ այն կերպով մոտ հարևաններ են, սերտ կապեր ունեն»։
Է.Վարդանյանի խոսքով՝ բնականաբար ռուս-վրացական պատերազմը պետք է բացասաբար ազդեր Հայաստանի վրա. «Եվ այստեղ շատ ավելի մեծ ազդեցություն ունեցավ Ադրբեջանի վրա, որովհետև, ըստ էության, դա այնպիսի մի նախադեպ էր, որ ցույց էր տալիս ռազմական բիրտ ուժով տարածքային ինչ-որ խնդիր լուծելու սնանկությունը։ Այսօր այդ ժամանակները չեն, և ըստ էության, այն գերտերությունները, որոնք մեծ ազդեցություն ունեն այս կամ այն տարածաշրջանի վրա, և երբ այդ տարածաշրջանը գտնվում է այս կամ այն պետության աշխարհաքաղաքական շահերի կիզակետում, նման ինքնագլուխ գործողությունները ուղղակի դատապարտված են ձախողման։ Եվ սա իսկապես դաս էր Ադրբեջանի համար և կարծում եմ, որ հիմնականում մեր տարածաշրջանի վրա հենց այդ դերակատարությունը ունեցավ դասեր ստանալու առումով»։
