Գենետիկ հազվադեպ հանդիպող խախտման պատճառով, որ կոչվում է ադերմաթոգլիֆիա, որոշ մարդկանց մոտ բացակայում են մատնահետքերը: Գենետիկայի մասնագետներին հաջողվել է, ի վերջո, պարզել այս մուտացիայի «մեղավորներին»: Ինչպես գրում է The New Scientist ամսագիրը, այս հայտնագործությունն հիշյալ շեղմամբ մարդկանց մատնահետքերը չի վերադարձնի, սակայն թույլ կտա խուսափել այլ խանգարումներից:
Թել Ավիվի համալսարանի մասնագետ Էլ Սփրեչերն ու նրա գործընկերներն ուսումնասիրել են երեք սերնդի մարդկանց, որոնց ընտանիքներում գրանցվել է նման խանգարում: Պարզվել է, որ մատնահետքերի բացակայությունը պայմանավորված է եղել SMARCAD1 գենում տեղի ունեցած մուտացիայով:
Հայտնի է, որ մատնահետքերը ձևավորվում են նորմալ հղիության միջին շրջանում: Համարվում է, որ յուրաքանչյուր մարդ ունի մատնահետքերի յուրահատուկ պատկեր: Սակայն գիտնականները վիճում են, թե որն է մատնահետքերի գործառնական կենսաբանական կարևորությունը:
Երկար ժամանակ կարծում էին, որ մատնահետքերը թույլ են տալիս մարդուն ավելի ամուր բռնել իրերը: Սակայն վերջերս որոշ գիտնականներ ասել են, որ շնորհիվ մատնահետքերի՝ մաշկի և այլ մակերեսների շփումը քչանում է, միաժամանակ ավելանում է զգայունությունը:
