«Սա քաղաքական ճգնաժամի հանգրվաններից մեկն է, որը ծագեց պատերազմից և դրանում կրած պարտությունից հետո»,- «Առաջին լրատվական»-ի հետ զրույցում ասաց «Քաղաքացու որոշում» կուսակցության գործադիր մարմնի քարտուղար Գոռ Հակոբյանը՝ անդրադառնալով ՀՀ ԶՈՒ ԳՇ-ի տարածած հայտարարությանը և դրան հաջորդած Նիկոլ Փաշինյանի՝ հանրահավաքի հրավիրելու հայտարարությանը:
Մեր զրուցակցի խոսքով՝ վերջին 3 ամիսներին քաղաքական ուժերը չցուցաբերեցին զսպվածություն, հեռատեսություն՝ երկխոսության և քաղաքական ճգնաժամի հաղթահարման համար:
«Նույնիսկ եթե պարտության պատճառները մի կողմ դնենք, պատերազմում պարտությունը հիմք էր, որպեսզի Նիկոլ Փաշինյանը հեռանար: Այդ պահանջը գեներացվել է հանրային օրակարգում: Եվ այժմ ռազմական ղեկավարության հայտարարությունից հետո Նիկոլ Փաշինյանի՝ հրապարակում հավաքվելու հայտարարությունը կարող է դառնալ քաղաքացիական բախումների պատճառ: Եվ եթե նման բան պատահի, դրա հիմնական պատասխանատուն լինելու է Նիկոլ Փաշինյանը»,- ընդգծեց Գոռ Հակոբյանը:
Մեր զրուցակցի կարծիքով՝ լավագույն լուծումը կլինի արտահերթ ընտրությունների հնարավորինս շուտ կազմակերպումը. «Որպեսզի լարված իրավիճակը թոթափվի, և սահմանադրական ճանապարհով կատարվի իշխանության փոխանցում ժողովրդի միջոցով»:
Առավել մանրամասն՝ տեսանյութում: