«Այս անգամ ընդդիմությունն ավելի լավ էր պատրաստվել հանրահավաքին, և ավելի մեծ թվով մարդիկ էին հավաքվել: Միավորված ընդդիմության ֆենոմեն է նկատվում: Նոր փուլ է մեկնարկում: Թե ինչ զարգացում կարող է լինել, կտեսնենք, չպետք է ո՛չ թերգնահատել , ո՛չ գերագնահատել ընդդիմության հնարավորությունները»- «Առաջին լրատվական»-ի հետ զրույցում այս տեսակետը հայտնեց քաղաքագետ Ալեքսանդր Իսկանդարյանը՝ անդրադառնալով դիտարկմանը, որ կա տպավորություն, թե քաղաքական տևական գործընթացների շրջան է մեկնարկել:
Իսկանդարյանը նշեց, որ Քոչարյանի անձն ավելի նկատելի է դառնում ընդդիմության շարքերում, բայց մյուս կողմից էլ՝ Սերժ Սարգսյանի դերը նույնպես մեծ է: Քաղաքագետի խոսքով՝ չի կարելի ասել, թե «17+» ձևաչափը կորցրել է իր նշանակությունը: ««17+»-ը իրավիճակային միավորում է, որտեղ համախմբվել են մարդիկ՝ գործող իշխանությանը դեմ լինելու սկզբունքով»
Քաղաքագետի դիտարկմամբ՝ բացառված չէ, որ «17+ » ձևաչափով միավորված առաջնորդները նաև մրցակցում են. «Եթե տեղի ունենա իշխանափոխություն, այդ պահից սկսած՝ կարտահայտվի այդ մարդկանց բազմակարծությունը, քանի որ նրանք միավորվել են ոչ թե հանուն ինչ-որ բանի, այլ ընդդեմ: Այդ ձևաչափում համախմբված ուժերը տարբեր են, և նրանց ծրագրերը իշխանափոխությունից հետո, իհարկե, տարբեր կլինեն»:
Իսկանդարյանի խոսքով՝ կառավարման առումով երկիրը փլատակների մեջ է: Քաղաքագետի կարծիքով՝ Նիկոլ Փաշինյանը հանրային աջակցություն չունի, հանրային աջակցություն չունի նաև ընդդիմությունը:
Մանրամասն՝ տեսանյութում: