Մարտի 1-ի գործով դատական պրոցեսը տարբեր միջնորդություններով պարբերաբար ձգձգվում է, նախօրեին էլ դատական նիստը կրկին հետաձգվեց, այսպիսով՝ սահմանադրական կարգի տապալման մեջ մեղադրվող Ռոբերտ Քոչարյանի գործը չի մտնում բուն դատաքննության փուլ:
«Առաջին լրատվական»-ը սկսել է հրապարակել 80 հատորանոց դատական գործից ցուցմունքներ, առանցքային դրվագներ, որոնք դեռևս չեն հրապարակվել:
Փաստաբան Սեդա Սաֆարյանն անդրադարձավ Ռոբերտ Քոչարյանի և զինվորականության կապին. «Ուզում եմ հրապարակել որոշակի դրվագներ՝ կապված սահմանադրական կարգի տապալման հետ և ներկայացնել, թե ինչպես է Քոչարյանը հարաբերվել տարբեր պաշտոնյաների հետ, և թե որոշ պաշտոնյաներ ինչ իրազեկվածություն են ունեցել՝ արտակարգ դրության հետ կապված: Եվ մի ամբողջ Ազգային ժողով, որ համաձայնություն է տվել նախագահի հրամանագրին, ինչ պատկերացում է ունեցել այդ հրամանագրի մասին»:
«Վերևից ներքև՝ Ռոբերտ Քոչարյան, Միքայել Հարությունյան, Միքայել Հարությունյանի ենթականեր. կարմիր գծի նման անցնում է համագործակցությունը Զինված ուժերի հետ, և այդ մասին փաստում է նաև համակարգից դուրս անձանց համազգեստ տրամադրելու հանգամանքը:
Միքայել Հարությունյանից ներքև՝ ստորին մակարդակում, մարդկանցից շատերը գուցե տեղյակ չեն եղել, թե ինչ կարող է լինել:
Միքայել Հարությունյանին պաշտոնով շատ մոտ կանգնած բարձրաստիճան պաշտոնյան ցուցմունք է տվել, որն ընդունում է, որ երբ Վայքում է եղել, Մարտի 1-ի հետ կապված ցուցումներ է ստացել, և ըստ նրա՝ այդ ցուցումները եղել են գաղտնի, փաստաթղթավորված չեն եղել:
Միքայել Հարությունյանն իրենց գաղտնի ցուցում է տվել սպայական կազմից մարդիկ բերել և որոշակի թվով զրահատեխնիկա բերել: Զրահատեխնիկան բերվել է Մասիս: Բարձրաստիճան այդ պաշտոնյան ասում է՝ տեղյակ է եղել, որ գիշերը կրակոցներ են եղել և զոհեր: Եվ նշում է, որ իր հետաքրքրության համար ժամը 4-5 ժամանակահատվածում եկել է Երևան, հրապարակ, Ձկան խանութի մոտ և որևէ զինվորականի կամ ոստիկանության աշխատակցի չի տեսել, բայց տեսել է, որ մեքենաներ են վառվում:
Այս պաշտոնյան զինվորականների տեղաշարժի հետ կապված նշել է, որ դա պայմանավորված էր հետընտրական ցնցումներով և նպատակը հնարավոր իշխանափոխությունը կանխելն էր: Եվ ընդունում է, որ իրեն ցուցում է տրվել զինվորականներին տանել և Կառավարության շենքում ներկայացնել կայազորի պետ Յուրի Խաչատուրովին:
Այս բարձրաստիճան զինվորականը փորձում է հերքել զորքի կրակելու հանգամանքը:
Խաղաղ ցույցեր էին տեղի ունենում, բայց իշխանությունը փետրվարի 22-23-ից ձեռնամուխ է եղել այս ենթադրվող հանցավոր համագործակցությանը, սահմանադրական կարգը տապալելու եղանակով կանգ չի առել որևէ անօրեն մեթոդի առաջ:
Ես կարծում եմ, որ Ռոբերտ Քոչարյանի և Միքայել Հարությունյանի միջև հանցավոր համագործակցությունը հիմնավոր է: Հարությունյանը, գիատկցելով, որ անգամ արտակարգ դրության պարագայում չի կարող զորքն օգտագործել, այնուամենայնիվ, կազմակերպել է զորքի տեղաշարժ, և զորքի տեղաշարժի պատասխանատուներից մեկը Սեյրան Օհանյանն է»,- նշեց փաստաբանը:
Մանրամասն՝ տեսանյութում:
