«Առաջին լրատվական»-ի զրուցակիցն է ՀՀԿ-ական նախկին պատգամավոր, ՀՀԿ խորհրդի նախկին անդամ Լեռնիկ Ալեքսանյանը։
– Պարոն Ալեքսանյան, Դուք մեր վերջին հարցազրույցում շատ էիք կարևորում արտահերթ խորհրդարանական ընտրությունների անցկացումը։ Իշխանությունը հրաժարվեց այդ գաղափարից։ Ձեր կարծիքով՝ ո՞րն էր պատճառը, ու ի՞նչ զարգացումներ կարող են լինել։
– Իշխանությունները կտրականապես չեն ասում, որ արտահերթ ընտրություններ չեն լինելու։ Նրանք ասում են, որ արտահերթ ընտրությունների վերաբերյալ հանրային պահանջ չկա։ Ես կարծում եմ, որ գարնանը ավելի լավ կուրվագծվի՝ նման պահանջ կա՞, թե՞ չկա։ Եթե հասարակության մոտ նման պահանջ լինի, կարծում եմ, որ արտահերթ ընտրություններ կլինեն։ Դա շատ կարևոր է։ Նախ՝ իշխանությունները իրենց լեգիտիմությունը կվերահաստատեն, իսկ ընդդիմությունը իր իմիջը կհաստատի։ Ընտրությունը դրա լավագույն միջոցն է, քանի որ այսօր մեկը մեկին ասում են՝ դու լեգիտիմ չես, դու չես վայելում հասարակության մեծամասնության աջակցությունը և այլն։ Այդ քննարկումներին վերջ դնելու լավագույն ճանապարհը արտահերթ ընտրություններն են
– Իսկ հասարակության պահանջը ինչպե՞ս պետք է արտահայտվի, ձևակերպվի, որ պարզ դառնա, որ արտահերթի պահանջ կա։
– Դրա ձևերը կան. սոցիոլոգիական հետազոտություններ, քաղաքական ուժերի գնահատականներ և այլն։ Ամեն դեպքում ասել, որ մարդիկ փողոց դուրս չեն գալիս՝ ուրեմն արտահերթ ընտրությունների պահանջ չկա, դա սխալ է։ Ես կարծում եմ, որ եթե նորից ընդդիմություն ձևավորվի և արդեն այդ ընդդիմությանը միավորվեն հասարակության լայն շրջանակներ, ապա արդեն պարզ կդառնա՝ հասարակական պահանջ կա, թե ոչ։ Համենայնդեպս, հիմա այդ պատկերը չկա։ «17+» կոչվածի մեջ մի քանի նորմալ կուսակցություն կա, մնացածը մարդ կուսակցություններ են։ Մնացածը չեզոք են ու այսօր հավաքված չեն որևէ առանցքի շուրջ։ Ես կարծում եմ, որ առաջիկայում կձևավորվի մի ուժ, և արդեն նրա շուրջ էլ այդ հասարակական պահանջը կձևավորվի։
– Ո՞ւմ շուրջ կարող է ձևավորվել այդ նոր ուժը։
– Դժվարանում եմ հիմա ասել։ Ով ավելի վճռական լինի, ով ունենա գաղափարներ, ով կարողանա ձևավորի ծրագիր, հեռանկար, նրան էլ ժողովուրդը կվստահի։
– «17+» ֆորմատը փլուզվում է։ Այդ ֆոնին ակտիվության նշաններ է ցույց տալիս Սերժ Սարգսյանը։ Նախօրեին Հանրապետության հրապարակ էր գնացել։ Քոչարյանն է հայտարարել ընտրություններին մասնակցելու պատրաստակամության մասին։ Գործող իշխանություններին հեռացնելու պահանջը կարո՞ղ է միավորել նախկին նախագահներին և դարձնել ձեր ասած այդ առանցքը, որի շուրջ պետք է համախմբում լինի։
– Ես կարծում եմ, որ ոչ։ Մարդիկ, քաղաքական գործիչներ կարող են դառնալ, բայց կուսակցությունների շուրջ առանցք չի ձևավորվի։ Մարդկանց շուրջ՝ գուցե։
– Օրինակ՝ Քոչարյանի՞։ Դա իրատեսակա՞ն է։ Արդյո՞ք նա վայելում է հանրային աջակցություն։
– Քոչարյանի շուրջ որոշակի ուժեր կհավաքվեն։
– Իսկ ներկա իշխանություններին հեռացնելու պահանջը կարո՞ղ է միավորել Սերժ Սարգսյանին, Ռոբերտ Քոչարյանին։
– Ես կարծում եմ, որ ոչ։ Նրանք չեն միավորվի։ Իսկ եթե միավորվեն էլ, ապա հանուն այսօրվա իշխանությունների հրաժարականի։ Իսկ հրաժարականից հետո, ես չեմ կարծում, որ նրանց մեջ կոալիցիա ձևավորվի, գնան իշխանության ձևավորման։ Դրանք տարբեր ուժեր են։ Լուրջ միավորում, չեմ կարծում՝ լինի։ Կան հնից եկած տարաձայնություններ, գաղափարական տարաձայնություններ։ Ես առհասարակ կարծում եմ, որ հին կուսակցությունները լուրջ խնդրի շուրջ չեն կարող միավորվել։ Նրանք միայն կարող են միավորվել այսօրվա իշխանություններին հրաժարական պարտադրելու համար։ Այդ առանցքը նրանց համար ընդհանուր է։ Իսկ իշխանության գալու, ընտրությունների ժամանակ նրանք կգնան առանձին-առանձին։
– Պարոն Ալեքսանյան, այսինքն՝ Դուք կարծում եք, որ արտահերթ ընտրությունների թեման վերջնականապես փակված չէ՞։
– Ես կարծում եմ, որ փակված չէ։ Այս իշխանություններին էլ են պետք արտահերթ խորհրդարանական ընտրությունները։ Հետպատերազմական գործընթացների հանդարտվելուց հետո չի բացառվում, որ գա պահ, որ իշխանությունը կգնա արտահերթ ընտրությունների՝ իր լեգիտիմությունը վերահաստատելու համար։
