Ռուսաստանի նախագահ Դմիտրի Մեդվեդևը կարծում է, որ Սիրիայի իշխանություններին տխուր վախճան է սպասվում, եթե չգնան ընդդիմության հետ երկխոսության և չքննարկեն բարեփոխումների ծրագիրը: «Մեր անձնական շփման և նամակագրության ժամանակ, որ հղել եմ Սիրիայի նախագահին, ես հայտնում եմ մի գաղափար՝ անհրաժեշտ է շտապ բարեփոխումներ իրականացնել, հաշտվել ընդդիմության հետ, վերականգնել հասարակական խաղաղությունը և ստեղծել ժամանակակից պետություն»,- ասել է Մեդվեդևը մի քանի լրատվամիջոցների տված հարցազրույցի ժամանակ:
«Եթե նա դա չկարողանա անել, ապա նրան սպասում է տխուր վախճան, և, ի վերջո, մենք ստիպված կլինենք որոշումներ կայացնելու»,- հավելել է Մեդվեդևը, որի կառավարությունը մինչև հիմա բոլոր ատյաններում աջակցում է Սիրիայի ներկայիս ռեժիմին։ Սակայն այս հայտարարությունները որոշակի ուղերձ են պարունակում:
Նախօրեին Սիրիայի իշխանություններին կոշտ քննադատության էր ենթարկել նաև Մեդվեդևի մերձավորարևելյան գործերով խորհրդական Միխայիլ Մարգելովը: Մեդվեդևը նաև համեմատական է անցկացրել Լիբիայի և Սիրիայի իրավիճակների միջև՝ ասելով, որ «Սիրիայում իրավիճակն ավելի դրամատիկ է զարգանում»: «Քադաֆին հստակ հրաման էր տվել բիրտ ուժով ճնշել ընդդիմությանը, իսկ ներկայիս նախագահ Բաշար Ալ-Ասադը նման հրաման չի տվել, սակայն, ցավոք, այնտեղ էլ են մեծ թվով մարդիկ զոհվում, և դա հարուցում է մեր լուրջ անհանգստությունը»,- ասել է Մեդվեդևը:
