Երեկ օրվա վերջում ամերիկյան ֆոնդային բորսաներն աննախադեպ անկում են արձանագրել: Մասնագետները նման բան չեն արձանագրել սկսած 2008 թ. հոկտեմբերից, երբ սկսվել էր համաշխարհային տնտեսական ճգնաժամը: Dow Jones-ի ինդեքսը նախորդ օրը նվազել է 4.31%-ով՝ հասնելով 11,383.68 կետի, իսկ NASDAQ-ը նվազել է 5.08%-ով՝ կազմելով 2,556.39 կետ: Այս մասին հաղորդում է Associated Press գործակալությունը:
Իրավիճակն այնքան է սրվել, որ ամերիկյան մի շարք հիմնական հեռուստաալիքներ դադարեցրել են իրենց հաղորդումները և ուղիղ եթեր ապահովել ֆոնդային բորսաներից՝ արտակարգ նորությունների հաղորդումների միջոցով վերլուծելով ստեղծված իրավիճակը: Ընդ որում, բոլորն ակնկալում էին, որ ԱՄՆ-ում բյուջետային ճգնաժամի ավարտից հետո ֆոնդային բորսաները կհանգստանան, և նման անկումներ չեն լինի:
Ամերիկյան բորսայի անկումից հետո այսօր վաղ առավոտից անհանգիստ է նաև ասիական բորսաներում: Ճապոնական ֆոնդային Nikkei ինդեքսը անկում է ապրել 3.8%-ով՝ կազմելով 9,264.09 կետ: Այս պահին այն գտնվում է 9,300 կետի վրա: