Այսօր՝ փետրվարի 10-ին, Ազգային ժողով-կառավարություն հարցուպատասխանի ժամանակ անկախ պատգամավոր Արման Բաբաջանյանը նշեց, որ իր գլխավորած ուժը դրական է արձագանքել վարչապետի՝ արտահերթ ընտրություն անցկացնելու հայտարարությանը. «Ինչ-որ առանձին քաղաքական ուժեր, որոնք չհամաձայնեցին գնալ արտահերթ ընտրությունների, ազդել են ձեր քաղաքական ուժի տրամադրությունների վրա: Դուք էլ չգիտեմ ինչ ուսումնասիրության հիման վրա կայացրել եք որոշում, որ այս պահին նպատակահարմար չեն այդ ընտրությունները: Միևնույն ժամանակ մենք տեսնում ենք, որ մարգինալ ուժերը, այդ թվում նաև` այսօր ԱԺ-ում էր հայտնվել ահաբեկչական անցյալ ունեցող կուսակցություններից մեկի ներկայացուցիչը և պատգամավորների զրահաբաճկոններն էր ստուգում: Այս պայմաններում դժվար է կայունություն ապահովել, իշխանություններն էլ ամեն անգամ իրենց անկարողությունն են ցույց տալիս»:
Պատգամավորի խոսքով` ուժով իշխանությունը տապալելու անթաքույց կոչ անողներին պատասխանատվության ենթարկելու մեխանիզմներ չեն գործադրվում. «Ազատ էր արձակվել Արարատ Միրզոյանի վրա հարձակված վերջին կալանավորը, և այս պայմաններում մենք նրանց հետ նույն ազատությունն ենք կիսում»:
Արման Բաբաջանյանն ընդգծեց. «Մարդիկ կայունություն են ուզում, և դա պատկերացնում են արտահերթ ընտրության միջոցով»:
Մանրամասն՝ տեսանյութում:
