Այսօր լրանում է ռուս-վրացական պատերազմի 3 տարին։ Հայաստանը երեք տարի առաջ հարևան երկրում ընթացող պատերազմի պատճառով տնտեսական խոշոր վնասներ կրեց, քանի որ դադարեցվեց առևտուրը մեր երկու տնտեսական գործընկեր հարևաններից մեկի հետ։ Ի՞նչ դաս պետք է քաղել այդ փորձից։ Արդյոք երեք տարվա ընթացքում որևէ բան արվե՞լ է Հայաստանի տնտեսական անվտանգությունն ապահովելու ուղղությամբ։
«Մեծագույն դասն այն է, որ մենք պետք է ունենանք մշակված մի քանի տարբերակ դուրս գալու նման իրավիճակից։ Պետք է ունենալ արտաքին քաղաքականության հայեցակարգ, որի վրա կմշակվեն բոլոր քայլերը ամեն հնարավոր իրավիճակներում»,- «Առաջին լրատվականի» հետ զրույցում ասաց քաղաքագետ Սուրեն Մովսիսյանը։
Քաղաքագետի գնահատմամբ՝ մեր արտաքին քաղաքականության ամենամեծ թերությունը դրա իրավիճակային լինելն է. չեն արվում ո՛չ երկարաժամկետ, ո՛չ կարճաժամկետ կանխատեսումներ: Սուրեն Մովսիսյանի խոսքով, ոչ մի փոփոխություն չի կատարվել մեր արտաքին քաղաքականության մեջ, չի մշակվել նման հայեցակարգ։
«Եթե հիմա լիներ 2008 թ. վրաց-ռուսական պատերազմը, մենք ավելի շատ կտուժեինք, քանի որ մեր մյուս հարևանը, ում հետ տնտեսական կապեր ունենք, ավելի վատ վիճակում է հիմա»,- ասում է Սուրեն Մովսիսյանը։