Օրերս Վահան Բադասյանը կալանավորվել է: Իրականում Բադասյանն ասել է այն, ինչ ամեն օր ասում են հազարավոր մարդիկ, սակայն նրանք չեն կալանավորվում: Ինչու նմանատիպ հայտարարություն արած այլ անձանց նկատմամբ կալանավորումը որպես խափանման միջոց չի կիրառվում: Թեմայի շուրջ Առաջին լրատվականը զրուցել է ՀՔԱՎ գրասենյակի ղեկավար, իրավապաշտպան Արթուր Սաքունցի հետ:
«Հայաստանում դատական իշխանությունը չի կարող երշախավորել արդար դատաքննության իրավունքը, հատկապես քրեկան գործերով: Բազմիցս բարձրաձայնվել է այդ հարցը, որ դատական իշխանությունը անջատված չէ գործադիր իշխանությունից, անկախ չէ: Թվում էր, թե հեղափոխությունից հետո այս հարցն օրակարգում ամենագլխավորը պետք է լիներ, որովհետև հեղափոխությունը նաև տարիներ շարունակ արդարության դեֆիցիտի հետևանքով եղավ:
Եվ հիմա տեսնում ենք, որ խիստ ընտրողական մոտեցում կա նույնատիպ դեպքերով, չնայած արդարադատությունը պահանջում է, որ ամեն մի կոնկրետ դեպքում իրավիճակը կամ անձի վարքագիծը համակողմանի ուսումնասիրվի: Չեմ կարծում, թե Վահան Բադասյանի դեպքում պատշաճ հիմքեր կային նրա նկատմամբ կալանավորումը որպես խափանման միջոց կիրառելու համար: Խափանման միջոց կալանքը պետք է կիրառել այն դեպքում, երբ կան հիմքեր, որ անձը կարող է խուսափել քրեական պատասխանատվությունից այն գործի շրջանակներում, որը հարուցված է, տվյալ դեպքում Վահան Բադասյանը չէր խուսափել: Երկրորդ՝ կիրառվում է, եթե կա հիմք, որ նա կարող է ազդել նախաքննության մարմնի կամ գործով անցնող վկաների վրա, տվյալ դեպքում չկան նաև նման հիմնավորումներ»,- նշեց Սաքունցը:
Իրավապաշտանն ընդգծեց, որ ընտրովի արդարադատությունը շարունակում է մնալ որպես Հայաստանի Հանրապետությունում թիվ մեկ մարտահրավերը. «Դատարանների վարքագիծը կանխատեսելի չէ… Այս ամենի պատասխանատուն իշխանությունն է: Օրակարգային խնդիր է դատական համակարգում վեթինգի իրականացումը, որպեսզի այնտեղ մթնոլորտը փոխվի»:
Մանրամասն՝ տեսանյութում:
