Ազգային անվտանգության ծառայությունն այսօր տեղեկացրեց, որ առանձնապես խոշոր չափերով գումարներ հափշտակելու կասկածանքով ԱԱԾ քննչական դեպարտամենտ է բերման ենթարկվել ՀՀ ՊՆ-ի մատակարար կազմակերպության խորհրդի նախագահ Դավիթ Գալստյանը՝ նույն ինքը Պատրոն Դավոն, որը նույն օրը հարուցված քրեական գործի շրջանակներում ներգրավվել է որպես մեղադրյալ։ Միջնորդություն է ներկայացվել դատարան կալանավորումը որպես խափանման միջոց կիրառելու վերաբերյալ: «Առաջին լրատվական»-ի տեղեկություններով՝ ոչ մի դատավոր չի համարձակվում քննել Պատրոն Դավոյի կալանավորման միջնորդությունը։ Մի քանի դատավոր արդեն իսկ անաշխատունակության թերթիկ են ներկայացրել՝ պատճառաբանությամբ, թե հիվանդ են։
Հիշեցնենք, որ Դավիթ Գալստյանի վերաբերյալ ԱԱԾ-ում քննվող քրեական գործի մասին հայտնի դարձավ երկու շաբաթ առաջ, սակայն այդ ժամանակ ԱԱԾ-ն լրատվամիջոցներին չէր ասել, թե Գալստյանը դատավարական ինչ կարգավիճակ ունի քննվող քրեական գործով, և արդյո՞ք նրա նկատմամբ խափանման միջոց կա ընտրված, թե՞ ոչ։ Պարզվում է՝ այս երկու շաբաթվա ընթացքում հնարավոր չի լինում լուծել կալանքի միջնորդության քննության հարցը։ Դատավորներից ոչ ոք չի ցանկանում այս աղմկահարույց գործով «անցավ գլուխը դնել ցավի տակ»։
