Ես արդեն 4 տարի է, որեւէ պետական պաշտոն չունեմ, զինվորական կենսաթոշակառու եմ. խելացի անձինք, որոնք փոքր ինչ կրթություն ունեն, գիտեն, որ այն մարդիկ, որոնք պաշտոն չունեն, չեն կարող որեւէ որոշում ընդունել: Այս մասին, այսօր՝ հունվարի 28-ին, «Եռաբլուր» պանթեոնում լրագրողների հետ զրույցում նշեց պաշտպանության նախկին նախարար Սեյրան Օհանյանը՝ անդրադառնալով խոսակցություններին, թե Շուշին ընկնելու հարցում եղել է դավաճանություն, եւ շրջանառվում է նաեւ իր անունը:
«Ես Շուշիում եղել եմ որպես կամավորական եւ փորձել եմ տեղի աշխարհազորին աջակցություն ցուցաբերել: Շուշիի մարտական գործողությունները, ինչպես նաեւ մնացած մարտական գործողությունները ղեկավարել է բանակի ղեկավարությունը եւ այդ բոլոր հարցերը կարող եք տալ բանակի ղեկավարներին: Իրենք կարող են ճիշտ պատասխան տալ, թե ինչու է կայանում Շուշիի առեղծվածը, բայց այն, որ բարձր մակարդակով տարբեր արտահայտություններ են անում, որ բանակցությունների հենց սկզբում Շուշին կար, որ Շուշին դժգույն քաղաք էր, Շուշին հայկական չէր: Այդ ամենը բերում է կասկածամտության, թե ինչպես եղավ Շուշիի անկումը»,-ասաց նա:
