Ստեղծված իրավիճակում ի՞նչ պետք է անենք, կամ ինչի՞ց պետք է սկսել, եթե ուզում ենք ունենալ կենսունակ, մրցունակ պետություն, որտեղ կապրենք բարեկեցիկ և արժանապատիվ։
Ըստ ձեզ՝ որո՞նք են առանցքային քայլերը, որ պետք է իրականացվեն տնտեսության մեջ․ «Առաջին լրատվական»-ի հարցին ԵՊՀ տնտեսագիտության և կառավարման ֆակուլտետի դեկան, Հանրային խորհրդի անդամ Հայկ Սարգսյանը պատասխանեց․ «Այսօր հասարակության մեջ առկա է բարոյահոգեբանական, թշնամանքի և ատելության մթնոլորտով միջավայր։ Իսկ ինչ վերաբերում է ճգնաժամերին, դա և՛ դիվանագիտական է, և՛ հումանիտար է, և՛ սոցիալ-տնտեսական է։ Այս իրողությունները պետք է սթափեցնող լինեն, սակայն հասարակության մեջ այսօր գերակշռում է անորոշությունների գիտակցումը, և սա չի կարող արդյունարար լինել։
Առաջին պլան են մղվել անվտանգային ազդակները, և հասարակությունը սպասումների մեջ է այս առումով, այն գիտակցումով, որ դրանք պետք է իրենց լուծումները գտնեն, բայց ինչպես, կարծեք թե խարխափում է։ Ես կարծում եմ, որ պետք է սկսել անորոշությունների հնարավորինս չեզոքացման և անվտանգային խնդիրների լուծումներից, որոնք իսկապես կպայմանավորեն սոցիալ-տնտեսական զարգացում և նախադրյալներ կստեղծեն վաղվա ավելի բարեկեցիկ, ավելի ուժեղ տնտեսություն ունենալու, հասարակություն ունենալու առումով։ Այստեղ ես կուզենայի առանձնացնել, որ ստեղծված կացության մեջ մեղավոր են երկու կողմեր։ Առաջինը, թերևս, իշխանությունն է, որի մոտ գրեթե չկա այն գիտակցումը, որ այսօր իրավիճակը կրիտիկական է, ես կասեի՝ նույնիսկ ողբերգական է, և խելամիտ գործելակերպն այսօր պարտադրված ու պահանջված է։ Երկրորդ մեղավորը ընդդիմությունն է։ Այսօր նշմարվում է նախընտրական շրջանի միջավայրի ձևավորում, սակայն հասարակությունը դեռևս չի տեսնում այն գաղափարական առանցքը, որի շուրջ կարող է ընթանալ այդ համախմբումը»։
Մանրամասները՝ տեսանյութում։