«Պատերազմը եռապատկել, քառապատկել է մեր խնդիրները: Անդառնալի կորուստներ ունեցավ մեր ժողովուրդը: Պատերազմը ռիսկեր բերեց նաև բնապահպանության ոլորտ և շրջակա միջավայրի վրա մեծ ազդեցություն թողեց, մասնավորապես հարավային տարածաշրջաններում, առաջնագծին մոտ բնության հատուկ պահպանվող տարածքներ, անտառներ ունենք, այդ առումով մեր խնդիրները եռապատկվել են »,- այս մասին «Առաջին լրատվական»-ի հետ զրույցում ասաց ՔՊ կուսակցության վարչության անդամ Ռոմանոս Պետրոսյանը՝ անդրադառնալով հարցին, թե հետպատերազմյան ճգնաժամը ինչ հետք է թողել նախարարության աշխատանքների վրա:
Անդադառնալով հարցին, թե ինչ տրամադրություններ են «Քաղաքացիական պայմանագրում»՝ կապված հետպատերազմյան և քաղաքական լարվածության հետ, Ռ. Պետրոսյանը նշեց. «Կուսակցությունում անձնական ողբերգություն ապրած տրամադրություն է, որովհետև այն աղետը, որի միջով անցավ մեր պետությունը, մեր ժողովուրդը, բոլորի վրա էլ իր անդրադարձն ունեցել է՝ շատերս հարազատներ, ընկերներ ենք կորցրել:
Իսկ քաղաքական գործունեության առումով կուսակցությունն այս փուլում թևակոխել է մի շրջան, երբ կա որոշակի վերաարժևորման, անցածը գույքագրելու և առաջիկա անելիքները նախանշելու անհրաժեշտություն: Կուսակցությունում տարակարծություն չկա, բայց կա այլակարծություն, որը բերում է առողջ բանավեճ, վերջում ծնվում է ճշմարտությունը:
«Քաղաքացիական պայմանագիրը» մի քանի ուղղություններով աշխատանքներ է իրականացնում, այդ թվում նաև պատրաստվում արտահերթ ընտրություններին: Մենք հայտարարել ենք, որ պատրաստ ենք գնալ արտահերթ ընտրությունների և միայն այդ կերպ պահել իշխանությունը կամ այն հանձնել լեգիտիմ այլ քաղաքական ուժի, որին ժողովուրդը կնախընտրի»:
Մանրամասները՝ տեսանյութում: