«Ռուս-վրացական պատերազմից հետո ամենակարևոր և տեսանելի փոփոխությունը կապված է տարածքների հետ, ինչպես նաև եղել է Աբխազիայի և Հարավային Օսիայի ճանաչումը որոշ երկրների կողմից»,- «Առաջին լրատվականի» հետ զրույցում, խոսելով 2008 թ. օգոստոսին տեղի ունեցած ռուս-վրացական պատերազմից հետո անցած տարիների ընթացքում եղած փոփոխությունների մասին, կարծիք հայտնեց Վրաստանի հասարակական հետազոտությունների ինստիտուտի հետազոտական կազմակերպության համանախագահ, փորձագետ Գեորգի Թարխան-Մուրավին:
Նա նաև նշեց, որ որոշակի փոփոխություններ այս երեք տարիների ընթացքում տեղի են ունեցել նաև Վրաստանի կառավարման համակարգում: Թարխան Մուրավին նկատեց, որ առաջիկայում Վրաստանում սպասվում են նաև ընտրություններ, որոնք ևս կարող են հնարավոր փոփոխությունների հիմք լինել:
Վրաց փորձագետը նաև ընդգծեց, որ այժմ կա վտանգ նոր ռազմական գործողությունների վերսկսման՝ հաշվի առնելով վերջերս Ռուսաստանի վարչապետ Վլադիմիր Պուտինի հայտարարությունը Հարավային Օսիայի Ռուսաստանին միանալու կապակցությամբ:
Հարցին, թե հնարավո՞ր է առաջիկայում լինեն այնպիսի նախադրյալներ, որոնք կարող են բարելավել ռուս-վրացական հարաբերությունները, Գեորգի Թարխան Մուրավին պատասխանեց. «Դեռևս նման նախադրյալներ չկան, և կարծում եմ՝ առաջիկա 2-3 տարիների ընթացքում նման բարելավում չի լինի: Թերևս հետո, երբ թե՛ Ռուսաստանում և թե՛ Վրաստանում կփոխվի իշխանությունը, հնարավոր է որոշակի առաջընթաց սպասել: Կարծում եմ՝ Սոչիի օլիմպիական խաղերից հետո փոփոխություններ կլինեն»:
