Միացյալ Նահանգների նախագահի պաշտոնին հրաժեշտ տված Դոնալդ Թրամփը այդ կարգավիճակում իր վերջին ուղերձում խոսել է նաև այն մասին, թե հպարտանում է, որ իր նախագահության շրջանում չի սկսել ոչ մի նոր պատերազմ: Թրամփը, անշուշտ, նկատի ունի Միացյալ Նահանգների սկսած որևէ պատերազմ՝ անկախ մասշտաբից: Եվ ուղիղ իմաստով, նա, իհարկե, իրավացի է: Միևնույն ժամանակ, Թրամփի ուղերձը թերևս պետք է դիտարկել ավելի լայն համատեքստում, հաշվի առնելով այն մեծագույն դերը, որ աշխարհաքաղաքականության և համաշխարհային անվտանգության մեջ ունի Միացյալ Նահանգները: Այդ իմաստով, Թրամփը իր նախագահության շրջանում ուղիղ չի սկսել որևէ պատերազմ, միևնույն ժամանակ, սակայն, թույլ է տվել պատերազմ Կովկասում: Թող չհնչի տարօրինակ, սակայն, թերևս, հենց թրամփյան քաղաքականության հետևանքով է առաջացել այն կարճաժամկետ, սակայն խիստ լայն վակուումը կովկասյան ռազմա-քաղաքական բալանսի առումով, որը թույլ է տվել Անկարային սկսել պատերազմ Արցախի դեմ: Բացարձակապես պատահական չէ այն, որ պատերազմը սկսել է գործնականում Թրամփի նախագահության ավարտին, երբ մոտենում էր ընտրությունը, երբ առավելագույնս հասունացել էր նրա ռեգիոնալ քաղաքականության հետևանքով առաջացած վակուումը և, միաժամանակ, Թրամփը առավելագույնս զբաղված էր լինելու ներքին ընտրապայքարով:
Այդ իմաստով, Արցախի դեմ պատերազմը Թրամփի նախագահության պատերազմն է, հաշվի առնելով Նահանգների հեգեմոն դերը ժամանակակից աշխարհաքաղաքականությունում: Այլ հարց է՝ Թրամփի վարչակազմի համար դա պարզապես սխալի՞ հետևանք էր, թե՞ միանգամայն գիտակցված հետքաշում և քարտ-բլանշ Թուրքիային: Համենայնդեպս, ակնառու է, որ բացի նախընտրական տրամաբանությունից բխող ուշադրությունից, որ Թրամփը դրսևորեց ընտրիչների քանակով ամենամեծ նահանգի՝ Կալիֆոռնիայի հայ ընտրողների ձայների համար, Սպիտակ տունը գործուն քիչ քայլեր ձեռնարկեց Թուրքիային զսպելու համար: Իհարկե, այստեղ այլ հարց է և այն, որ չկար դրա մեծ մոտիվացիան, որովհետև զսպել Թուրքիային, նշանակելու էր աջակցություն ոչ թե Արցախին, այլ Ռուսաստանին, որը, սակայն, ոչ միայն ԱՄՆ գործընկեր չէ, այլ Սառը պատերազմի տրամաբանությամբ է խոսում Արևմուտքի հետ: Այդուհանդերձ, Թրամփը նախընտրեց Կովկասում խաղալ Թուրքիայի միջոցով, ինչը բերեց Արցախի դեմ պատերազմի: