«Ընդհանուր տպավորությունն այնպիսին էր, որ այնտեղ հանդիպում են երկու հաղթողներ և մեկ պարտվող կողմ: Հայաստանի վարչապետի ճնշված կեցվածքը, իհարկե, հասկանալի էր, և այնպես չէ, որ եթե նրա փոխարեն ուրիշը բանակցեր Հայաստանի անունից, այլ էր լինելու, որովհետև նա էլ էր ստիպված լինելու բանակցել՝ հաշվի առնելով ստեղծված քաղաքական իրողությունները»,- «Առաջին լրատվական»-ի հետ զրույցում նշեց քաղաքագետ Արմեն Բաղդասարյանը՝ անդրադառնալով երեկ Մոսկվայում կայացած Ռուսաստանի, Ադրբեջանի և Հայաստանի ղեկավարների հանդիպմանը:
Նրա խոսքով, սակայն, պարտված, ջախջախված, նվաստացած ղեկավարը զուտ հոգեբանորեն, բնականաբար, չէր կարողանալու բանակցել. «Դա ցույց տվեց նաև ստորագրված փաստաթուղթը, որովհետև Ռուսաստանն ու Ադրբեջանը ստացան այն, ինչ իրենց պետք էր, իսկ ինչ հետաքրքրում էր հայկական կողմին, բնականաբար հայկական կողմը չստացավ: Գերիների և անհետ կորածների հարցը, ինչքան հասկացա, նույնիսկ լրջորեն չի էլ քննարկվել, հարցին անդրադարձել են իմիջիայլոց: Այդ ծանր, նվաստացուցիչ վիճակը պատերազմի արդյունքն էր»:
Ինչ վերաբերում է Ռուսաստանում Հայաստանի դեսպանատան դիմաց հայերի կողմից կազմակերպված բողոքի ակցիաներին՝ ընդդեմ Նիկոլ Փաշինյանի, քաղաքագետն ասաց. «Երևույթն իհարկե տհաճ էր. այն, ինչ կարելի է անել Հայաստանի ներսում, չի կարելի անել դրսում, որովհետև ամեն դեպքում այդ մարդը ներկայացնում էր Հայաստանի Հանրապետությունը: Չէր կարելի ամբողջ աշխարհի աչքի առջև առանց այն էլ նման ծանր վիճակում հայտնված երկրի ղեկավարին ավելի նվաստացնել, ավելի թուլացնել, որ ավելի խղճուկ դիրքերից հանդես գա»:
Մեր զրուցակիցը չի կարծում, թե այդ ակցիան Ռուսաստանի իշխանություններն էին կազմակերպել. «Հնարավոր է, որ կազմակերպել էին տեղի հայ համայնքի ինչ-որ ներկայացուցիչներ Հայաստանի ընդդիմադիր շրջանակների հետ համագործակցությամբ»:
Առավել մանրամասն՝ տեսանյութում: