Ըստ Համաշխարհային բանկի՝ 2020 թվականը Հայաստանը փակել է 8 տոկոս տնտեսական անկմամբ, սակայն ՀԲ զեկույցից պարզ է դառնում, որ 2021 թվականին հայաստանյան տնտեսությունը վերականգնման շանսեր ունի. ՀԲ կանխատեսմամբ՝ Հայաստանում 2021թ. տնտեսական աճը կգերազանցի 3 տոկոսը: Այս առնչությամբ ՀՀ Կենտրոնական բանկի նախկին նախագահ Բագրատ Ասատրյանը «Առաջին լրատվական»-ի հետ զրույցում նշեց, որ գալիք տարվա հետ կապված անորոշությունը շատ ավելի մեծ է. «Համենայնդեպս ես չեմ տեսնում պատճառն ու տեղը, որ տնտեսական աճ ընդհանրապես տեղի է ունենալու: Մենք բախվել ենք բավականին մեծ խնդիրների, և դեռ հայտնի չէ, թե մենք արդյոք ի վիճակի կլինե՞նք նման ցուցանիշ ապահովելու»:
Մեր զրուցակցի խոսքով՝ ՀՀ տնտեսությունը անորոշ ծանր վիճակում է. «2020 թվականի վրա ազդել է միայն համավարակը, իսկ պատերազմի հետևանքները մենք դեռ չենք տեսել, այդ հետևանքները դեռ կտեսնենք 2021 թվականին, թեև դրանց բացասական հետևանքներն արդեն նկատելի են: Չմոռանանք նաև, որ համավարակի խնդիրներն էլ դեռ ավարտված չեն. աշխարհում այդ առումով անորոշություն է»:
Բագրատ Ասատրյանն ընդգծեց, որ Հայաստանը բախվել է երկու տեսակի խնդիրների. «Լեռնային Ղարաբաղը և նրա շուրջը եղած շրջանները ըստ էության կարծես կամաց-կամաց ներառվում էին Հայաստանի տնտեսական համակարգի մեջ: Օրինակ՝ Ղարաբաղից էլեկտրաէներգիա էր ներմուծվում Հայաստան, մի բան, որն այսօր չի կարող տեղի ունենալ: Խնդիրները բազմաթիվ են, պետք է դնել հատ-հատ ռիսկերը գնահատել և նաև լուծումներ առաջարկել: Կտրուկ պետք է ակտիվանա իշխանությունների վարած տնտեսական քաղաքականությունը, որովհետև մենք բարդ վիճակում ենք գտնվում»:
Առավել մանրամասն՝ տեսանյութում:
