Ի՞նչ եք կարծում՝ եթե փորձենք դատել այս տարվա առաջին նախանշաններից, ապա ի՞նչ ծանրության տարի է մեզ սպասվում․ «Առաջին լրատվական»-ի հարցին պատմաբան Զոհրաբ Գևորգյանը պատասխանեց․ «Եթե առաջին նախանշաններից դատենք, ապա քաղաքական առումով դատարկության տարի է սպասվում։ Այսինքն՝ եթե փորձենք ելնել սովորական քաղաքացու դիրքերից, որը նայում է այն հարթակին, որտեղ տեղի են ունենում քաղաքական գործընթացներ, և ցանկանում է հասկանալ տրամաբանություն՝ արժեքային ինչ-որ պրոցես, ապա դա չկա։ Ես կասեի՝ փոխաբերական իմաստով ավելի դատարկ ընթացք է, բայց կարծում եմ, որ հնարավոր է որոշակի միտումներ զարգանան՝ և՛ աշխարհաքաղաքական, և՛ ներքին։ Ներքին պրոցեսներում նոր ռեսուրսների հարթակ գալու հետ գուցե իսկապես քաղաքական խմորումները դառնան ավելի բովանդակային։
Այսօր մենք տեսնում ենք, որ աշխարհում շատ հետաքրքիր գործընթացներ են տեղի ունենում, ու այս առումով ես լավատես եմ, որ Հայաստանում ևս որոշակի աշխարհաքաղաքական, համաշխարհային զարգացումների միտումները հասարակության որոշ անդամներ կզգան և ավելի ինտենսիվ քաղաքական գործընթացների մեջ կմտնեն, և այն կդառնա դրական առումով ծանր ու բովանդակային»։
Իսկ սոցիոլոգ Արտակ Սաղաթելյանն ասաց․ «Միանշանակ, մեզ ծանր տարի է սպասվում, բայց փորձելով լավատես լինել՝ նոյեմբերի 9-ից մինչև տարեվերջ ընկած ժամանակահատվածը, դատելով, թե ինչպիսի սարսափելի իրադարձությունների միջով ենք մենք անցել և ինչ իրադարձություններ կարող էին լինել մեզ մոտ (իսկապես, հասարակության մեջ բախումներ կարող էին լինել), խուսափեցինք։ Սակայն չենք կարող ոգևորվել, որովհետև տագնապալի իրադարձությունները գոնե շաբաթը մեկ անգամ մեզ լուրերի տեսքով գալիս են։ Ամսի 11-ին նորից ինչ-որ իրադարձությունների ենք սպասում, և բոլորիս մոտ այդ առումով վախ կա»։
Մանրամասները՝ տեսանյութում։