«Առաջին լրատվական»-ի զրուցակիցն է Արցախի Պահպանողական կուսակցության նախագահ, Արցախի նախագահ Արայիկ Հարությունյանի խորհրդական Դավիթ Բաբայանը։
-Պարոն Բաբայան, մամուլում տեղեկություն կա, որ Ձեզ պատրաստվում են նշանակել Արցախի ԱԳ նախարար…
–Ես տեղյակ չեմ։ Եթե նման բան լինի, ոչ ոք չի թաքցնելու, բայց ես իսկապես տեղյակ չեմ։
-Արցախում նոր քաղաքական վերադասավորումներ սպասվո՞ւմ են։
–Ընդհանրապես փոփոխությունները շատ կարևոր են, եթե որակական են։ Այդ փոփոխություններն անհրաժեշտ են ու եթե որակական են, դա միայն դրական զարգացումների է բերելու։ Այնուամենայնիվ, որպեսզի մենք գնահատենք ցանկացած փոփոխություն՝ ժամանակ է հարկավոր։ Որևէ փոփոխության արդյունք անմիջապես չի երևում։ Հետևաբար փոփոխությունները պետք է լինեն որակական ու մենք պետք է որոշ ժամանակ սպասենք, նոր տեսնենք, թե դրանք ինչպիսի ազդեցություն են թողնում երկրի, պետության կենսագործունեության վրա։
-Բայց նկատելի է Արցախի արտաքին քաղաքականության մեջ փոփոխություն՝ ավելի մոտ դեպի պրոռուսական կողմնորոշմանը։
-Ընդհանրապես արտաքին քաղաքականությունը մեր երկրի համար շատ կարևոր է։ Պետք է ճիշտ, հնարավորինս իրատեսական քաղաքականություն վարենք։ Իրատեսականությունը ամենակարևոր հիմքերից է, որը նաև աշխարհաքաղաքական կանոնների ճիշտ դրսևորումներից է։ Մենք ինչքան ավելի իրատեսական լինենք, այնքան ավելի արդյունավետ արտաքին քաղաքականություն ենք վարելու։
-Դա վերաբերում է կոնկրետ Ռուսաստանի՞ հետ համագործակցությանը։
-Բոլորի։ Իսկ այն, որ Ռուսաստանը մեզ համար եղբայրական երկիր է և ռուս ժողովուրդն է եղբայրական՝ փաստ է, այդպես է արդեն դարեր շարունակ։
-Բայց նկատելի է, որ ռուս խաղաղապահների ներկայությամբ մեծացել է նաև ռուսական ազդեցությունը Արցախում։
-Ոչ թե ազդեցությունը, այլ պատասխանատվությունը։Եթե ռուսական խաղաղապահներն այստեղ պահպանում են խաղաղությունն ու կայունությունը՝ դա մեծ պատասխանտվություն է։ Մենք չպետք է ամեն ինչ փորձենք դիտարկել ինչ-որ ազդեցության ներքո։Պատասխանատվությունը հարյուր տոկոսով մեծացել է, նոր որակ է ստացել, որովհետև մեծ բեռ է պահպանել այդպիսի պայթյունավտանգ տարածաշրջանում խաղաղությունն ու կայունությունը սեփական ուժերով։
-Սա ենթադրո՞ւմ է, որ մոտ ապագայում ռուսական անձնագրերի հարցն իսկապես կարող է արդիական դառնալ։
–Ռուսական անձնագրերի տրամադրումը տարբեր մարդկանց կախված չէ կարգավիճակից կամ ներկայիս իրավիճակից։ Ռուսական քաղաքացիության ընդունումը, եթե տեղյակ եք, վերջին տարիներին շատ ավելի ազատականացել է։Նրանք, ովքեր ծնվել են ԽՍՀՄ ժամանակահատվածում, կարող ենք առանց որևէ խոչընդոտի ստանալ ռուսական քաղաքացիություն։ Կապ չունի՝ Երևանում ես ապրում, Թբիլիսիիում, թե Արցախում։ Տեսեք, թե նույն Երևանում ամեն օր ինչքան մարդ կա ՌԴ դեսպանատան դիմաց, որոնք նույնպես ուզում են ստանալ ռուսական քաղաքացիություն։Այսինքն ՝ սա կախված չէ Արցախի ներկայիս կարգավիճակի հետ,պարզապես այդ երկիրն ունի քաղաքացիություն ստանալու շատ մեղմ, լիբերալ ընթացակարգ։ Եվ անկախ նրանից՝ եթե մարդ ծնվել է հետխորհրդային տարածաշրջանում, շատ ավելի հեշտ է ստանում ՌԴ քաղաքացիություն և դա կախված է ներկայիս կարգավիճակի հետ։
