«Վարչապետն օրերս, երբ հրապարակեց արտահերթ ընտրություններ անցկացնելու հանձնառության մասին, մեր կուսակցությունն անմիջապես հանդես եկավ հայտարարությամբ. պատրաստակամություն հայտնեցինք ընտրություններին և քաղաքական խորհրդակցություններին մասնակցելու վերաբերյալ: Այսօրվա հանդիպումը հենց այդ օրակարգին էր վերաբերում, թե մենք ինչ վերաբերմունք ունենք արտահերթ ընտրությունների գաղափարի վերաբերյալ»,- այս մասին «Առաջին լրատվական»-ի հետ զրույցում ասաց «Հանուն հանրապետության» քաղաքական խորհրդի անդամ, ԱԺ անկախ պատգամավոր Արման Բաբաջանյանը՝ անդրադառնալով վարչապետ Նիկոլ Փաշինյանի հետ այսօր կայացած հանդիպմանը:
«Մենք ամբողջությամբ համակարծիք ենք, որ ստեղծված իրավիճակը կարելի է հանգուցալուծել բացառապես արտահերթ խորհրդարանական ընտրություններ անցակցնելու միջոցով: Անհեթեթ եմ համարում հրաժարականի վերաբերյալ այն պահանջները, որ կան հրապարակում և հրապարակից դուրս: Խորհրդարանական ուժերից մեկը՝ ԲՀԿ-ն, 17 ուժերի մաս է կազմում և նրանք վարչապետի հրաժարականն են պահանջում, նաև «Լուսավոր Հայաստանն» է պահանջում, բոլորը, թերևս, տարբեր պատճառներ ունեն, բայց գլխավոր պատճառը, իմ համոզմամբ, այն է, որ այդ ուժերը սկեպտիկ են իրենց հնարավորությունների մասով, առնվազն նրանք հասկանում են, որ նոր ընտրությունները կրճատելու են նրանց՝ խորհրդարանում լինելու հնարավորությունը»,- նշեց Բաբաջանյանը՝ նաև ընդգծելով, որ իր կարծիքով՝ Նիկոլ Փաշինյանի հրաժարականին հասնելու գլխավոր նպատակը հաղթահարելն է ժողովրդի իշխանությանը:
Պատգամավորի խոսքով՝ ժողովրդի իշխանության սիմվոլը Նիկոլ Փաշինյանն է, և նրա հրաժարականին հասնելով այդ ուժերը, ըստ էության, հաղթահարած կհամարեն ժողովրդի իշխանությունը և դրանից հետո ինչ ուզեն, կարող են անել:
«Մենք դեմ ենք, որ մեր երկրում հաղթահարվի ժողովրդի իշխանությունը, հակառակը՝ մեր քաղաքական ուժը գործողությունների ճանապարհային քարտեզ է ներկայացրել, որպեսզի անհրաժեշտ քայլերը կարողանանք արագորեն իրականացնել, դրանք հարցեր են, որոնք վերաբերում են Ընտրական օրենսգրքին, դատական իշխանությանը, Հակակոռուպցիոն մարմնին, ԿԸՀ-ին: Սրանք այն անհրաժեշտ կառուցակարգերն են, որոնք կպաշտպանեն ժողովրդի իշխանությանը: Առանց այս հարցերին լուծում տալու կարելի է համարել, որ ժողովուրդը որևէ մասնակցություն և որևէ ազդեցություն չի ունենալու ընտրությունների ելքի վրա:
Եթե մենք հավատում ենք, որ ժողովրդի կամքը պիտի որոշի այս երկրում իշխանության հարցը, ուրեմն պետք է այս փոփոխությունները լինեն հանուն ժողովրդավարության պաշտպանության: ժողովրդավարությունը չի կարելի թողնել անպաշտպան: Եվ իմ ուղերձը վարչապետին այն էր, որ այս իրավիճակում իրավունք չունենք արագ ընտրությունների գնալու որոշում կայացնելու, պետք է նախ քայլեր ձեռնարկվեն հիմնարար փոփոխություններ իրականացնելու ուղղությամբ, որից հետո միայն պիտի տեղի ունենան արտահերթ ընտրական գործընթացները»,- նշեց Բաբաջանյանը: Նա նաև նկատեց, որ ընտրությունները մերժող ուժերը չեն ուզում դիմել հասարակությանը:
Արման Բաբաջանյանի դիտարկմամբ՝ ժողովրդավարությունը նույնպես ոչ պակաս կարևոր անվտանգային հարց է Հայաստանի համար: «Եվ այն անհրաժեշտ պաշտպանություն պիտի գտնի այն քաղաքական ուժերի կողմից, որոնք կպաշտպանեն Հայաստանում արտահերթ ընտրությունների ճանապարհով իրավիճակը հանգուցալուծելու ուղին»,- եզրափակեց պատգամավորը:
Մանրամասները՝ տեսանյութում:
