Այսօր առողջ բանավեճ չկա, այսօր շատ աղմուկ կա, ինչը ինձ համար, որպես Հայաստանի քաղաքացու, վիրավորական է: «Առաջին լրատվական»-ի հետ զրույցում այս մասին ասաց գրող, հրապարակախոս Վահրամ Մարտիրոսյանը:
«Մենք սգի մեջ ենք, և սուգը պիտի ապրենք, սա երեք օրվա սուգ չէ, դեռ առնվազն գերիները պիտի վերադառնան և մեր զոհված զինվորների աճյունները պիտի վերադարձվեն հայրենիք: Սուգը դեռ երկար ժամանակ մեր ներսում պիտի լինի ու մեզ պիտի պարտադրի ուրիշ ձայնով խոսել, թեկուզ ասել ամենադառն բաները, բայց հայհոյանք, ատելության խոսք չպետք է հնչեն, դրանք էլ են վիրավորանք: Եթե անելու բան ունես, արա, ամենամեծ թշնամանքի դեպքում էլ պետք չէ անցնել կարմիր գծերը և անցնել հայհոյախոսության: Մենք մեզ համարում ենք լավ ժողովուրդ, բայց մյուս կողմից էլ՝ բոլորն իրար հայհոյում են ու համարում են ամենավերջին կարգի մարդիկ, ուրեմն մենակ սահմանամերձ գյուղո՞ւմ են մեր ժողովրդի լավ մասնիկները»,- նշեց Մարտիրոսյանը:
Նրա դիտարկմամբ՝ սգալն էլ մի մշակույթ է. «Եվ մեր զինվորները, որոնք տարել են պատերազմի ծանրությունը, տեսել են ընկերների զոհվելը, վիրավորվել են, նրանք օրինակ են ծառայում, թե ինչպես են իրենք զուսպ տանում իրենց վիշտը և դառնությունը չեն վերածում հայհոյանքի: Այդ սերունը պիտի զսպվածությունը բերի հանրային կյանք. եթե կարող ենք ինչ-որ բան անել, անենք միայն լավ բան»:
Մանրամասն՝ տեսանյութում: