ԱՄՆ Կոնգրեսը համաձայնության է եկել 900 միլիարդ դոլարի՝ տարբեր ծախսեր ներառող փաթեթի շուրջ, որը կտրամադրվի մոտ ամիսներին: Այն պարունակում է նաև ԼՂ հակամարտության, Հայաստանի ու Ադրբեջանի հետ կապված դրույթներ: Իր ելույթի ժամանակ այս մասին ասել է Սենատում հանրապետական մեծամասնության ղեկավար Միչ Մաքքոնելը:
Օրինագծի՝ «Հայաստանի ու Ադրբեջանի միջև լարվածության գնահատական» խորագրով հատվածում նշվում է, որ օրինագծի ուժի մեջ մտնելուց ոչ ուշ, քան 90 օր անց Ազգային հետախուզության տնօրենը Կոնգրեսի հետախուզական հարցերով հանձնաժողովներին պետք է գրավոր գնահատական ներկայացնի Հայաստանի և Ադրբեջանի միջև առկա լարվածության վերաբերյալ, այդ թվում՝ Լեռնային Ղարաբաղի կարգավիճակի մասին:
Ըստ օրինագծի՝ փաստաթուղթը պետք է ներառի նաև հետևյալ դրույթները՝ տարածաշրջանում Միացյալ Նահանգների և նրա գործընկերների ռազմավարական շահերի բացահայտումը, Լեռնային Ղարաբաղի շուրջ և Հայաստանի ու Ադրբեջանի սահմաններին 2020 թվականի ընթացքում ուժի կիրառման բոլոր նշանակալի դեպքերի նկարագրությունը՝ ներառյալ ուժի նշանակալի կիրառման յուրաքանչյուր դեպքի նկարագրությունը և գնահատականը, թե կողմերից որ մեկն է նախաձեռնել ուժի կիրառում, ԱՄՆ կողմից Ադրբեջանին և Հայաստանին տրամադրված ռազմական օգնության ազդեցության գնահատականը տարածաշրջանում ուժերի հավասարակշռության տեսանկյունից և ռազմական ուժի հետագա օգտագործման հավանականությունը, ինչպես նաև տարածաշրջանում ուժի հետագա կիրառման կամ հնարավոր ապակայունացման գործողությունների հավանականության գնահատում մոտակա և միջնաժամկետ հեռանկարում:
Օրինագիծը պահանջում է նաև, որ պատրաստվող փաստաթուղթը ներկայացվի առանց գաղտնի տեղեկության հրապարակման, բայց անհրաժեշտության դեպքում կարող է պարունակել գաղտնի տեղեկատվությամբ հավելված:
Թեմայի շուրջ «Առաջին լրատվական»-ը զրուցեց Ամերիկայի Հայկական համագումարի տարածաշրջանային գրասենյակի տնօրեն Արփի Վարդանյանի հետ։
– Տիկին Վարդանյան, ի՞նչ կարծիք ունեք այս օրինագծի մասին։ Հասկանալի է, որ ԱՄՆ-ում շուտով վարչակազմ է փոխվելու, և շատերի հետաքրքրությունը ավելի շատ ներքաղաքական խնդիրներին է ուղղված։ Այդուհանդերձ, Հայաստանի և Արցախի հետ կապված դրույթներ պարունակող այս օրինագիծն ի՞նչ կարևորություն ունի։
– Բնականաբար շատ կարևոր է, որ այդ որոշումները կայացվեն։ Ճիշտ եք նաև նշում՝ հունվարի 20-ին վարչակազմը փոխվելու է, նոր նախագահը կստանձնի իր պաշտոնը, և մենք հույս ունենք, որ այս հարցերին շատ ավելի մեծ ուշադրություն կդարձվի, քան նախկինում։ Շատ կարևոր է ունենալ մի նախագահ, որը ծանոթ է Հայաստանին, հայերին, հայկական խնդիրներին։
Իհարկե, օրինագիծը միայն Հայաստանին չի վերաբերում, և այն ամենադրական տարբերակը չէր, որ կարելի էր ունենալ, բայց միևնույն ժամանակ ասեմ, որ մենք պետք է փորձենք դրական բաներ քաղել մեզ համար։ Նախագիծը շատ այլ կետեր է պարունակում։
– Այնուամենայնիվ, դրական է, որ թեկուզ ԱՄՆ-ի համար բարդ ներքաղաքական փուլում հիշատակվում է Հայաստանը։
– Այո՛, իհարկե։ Բայց ես անձամբ ավելի դրական կհամարեի, որ հարց չուղղեին, թե ով է սկսել Արցախի վրա հարձակումները։ Իմ կարծիքով՝ դա առավել քան ակնհայտ է, բայց դրական է, որ գնահատվեց ու տեղ գտավ այդ նախագծի մեջ։
Նաև կա հիշատակում 907 բանաձևի հետ կապված։ Ես դա շատ կարևոր եմ համարում։ Եթե չկասեցվի՝ միանշանակ դրական է։ Նորից վերականգնվել է այդ բանաձևը, հիմնականում գարնան ամիսներին է այն կասեցվում, ինչպես եղավ այս տարի։ Բայց եթե չկասեցվի՝ Հայաստանի համար շատ դրական է։
– Իսկ կոնգրեսականների տրամադրվածությունը հայկական հարցերի հետ կապված ինչպիսի՞ն է։
– Կան մարդիկ, որ մեզ միշտ օգնել ու օժանդակել են և շատ մտահոգված են այս հարցերի շուրջ։ Բայց պետք է հիշենք նաև, որ իրենք ԱՄՆ-ի կոնգրեսականներ են, ու կան հարցեր, որ ԱՄՆ քաղաքացիների համար շատ ավելի կարևոր են, իրենց առօրյա կյանքի վրա են ազդում, ինչպես, օրինակ, Կովիդը։ Լավ է իհարկե, որ այս ամենի հետ մեկտեղ հայերին են ուշադրություն դարձնում։ Նոր նախագահի ընտրությանը քիչ մնաց, և դեմոկրատները Սպիտակ տանն ու Կոնգրեսում ավելի շատ ուժ կունենան։ Ուզում եմ հավաստիացնել, որ հայաստանցիների, Արցախի, հայերի խնդիրները չեն մոռացվում ԱՄՆ-ում։