«Առաջին լրատվական»-ի հարցերին պատասխանել է Հանրային խորհրդի նախագահ Ստյոպա Սաֆարյանը։
– ՀՀ ԶՈՒ պահեստազորի և պաշտոնաթող հայտնի գեներալները հայտարարություն են տարածել, որտեղ նշել են, որ իշխանություններն ի զորու չեն կառավարել պետությունը, չունեն անհրաժեշտ որակներ, պետք է անհապաղ հրաժարական տան: Ինչպե՞ս եք գնահատում այս հայտարարությունը՝ հաշվի առնելով, որ նրանք այն գեներալներն են, որոնցից ամեն մեկը դղյակներ ունի կառուցած:
– Ես կսպասեի, որ գեներալիտետը, որպես շահագրգիռ կողմ, ինքը առաջին հերթին պետք է ցանկանար, որ պատերազմի հետաքննություն լիներ: Ընդհանուր առմամբ, եթե ուշադիր լինեք, շատ քիչ մարդիկ են բարձրացնում պատերազմի հետաքննության հարցը: Դրանում առաջին շահագրգիռ մարդիկ պետք է լինեին գեներալները: Եթե նրանք շահագրգիռ չեն, դա շատ մտահոգիչ է և հարցերի տեղիք է տալիս: Մեր կառուցած բանակին պատերազմի ընթացքում՝ սկսած գեներալներից, ամենասահմռկեցուցիչ մեղադրանքներն են ներկայացվում՝ փախուստ իրենց հատկացված պատասխանատվության գոտիներից, անհասկանալի վարքագիծ և այլն: Ես չեմ ասում, որ սրանք հաստատված մեղադրանքներ են, բայց, բոլոր դեպքերում, պատերազմից հետո հնչեցված մեղադրանքներ են, որոնք անպատասխան են մնացել: Գեներալներին առաջին հերթին պետք է հուզեր դա, թե ինչու մենք բանակում ունեինք այն, ինչ ունեինք, և եթե գեներալները պնդում են, որ կարելի էր հաղթել, ապա պետք է ապացուցեն, թե որոնք են եղել չհաղթելու պատճառները, առաջնագծում կռված բազմաթիվ մարդիկ իրենց վարկածներն են առաջարկել, ընդ որում՝ տալով ամենատարբեր գեներալների անուններ նրանց տարօրինակ վարքագծի կապակցությամբ: Հետևաբար, ես կարծում եմ, որ գեներալներին ավելի կպատշաճեր պահանջել առաջին հերթին Արցախի բանակի և ՀՀ բանակի հետ կապված այն հասցեագրված մեղադրանքները և վեր հանել իրականությունը: Այլապես ստացվում է, որ գեներալներին հետաքրքրում է բացառապես քաղաքական իշխանությունը:
– Ձեր կարծիքով՝ ինչո՞ւ ունենք այս վիճակը, դուք նախկինում հիշո՞ւմ եք, որ գեներալներն այսպիսի հայտարարություն անեն իշխանության նկատմամբ:
– Ուղղակի հիմա ազատության վիճակ է: 2018-ից հետո խոսքի լիակատար ազատության վիճակ է, և պատահական չէ, որ, սկսած բուհերի դասախոսներից, բանակի գեներալներից, թեկուզ պաշտոնաթող, կարող են այսպես արտահայտվել: Նախկինում անգամ պաշտոնաթող գեներալները չէին կարող որևէ ծպտուն հանել իշխանության սխալների մասին: Այստեղ ինձ մեկ այլ բան է հետաքրքրում. գեներալները տեսնում են, որ փողոցներում տարբեր խմբակների կողմից իշխանության հասցեին դավաճանության կոչեր են հնչում: Նաև գեներալները տեսնում են, որ հենց իրենց բազում ազատամարտիկներ ու զինվորներ մեղադրում են ոչ միայն բանակի ներկայիս իրավիճակի, ոչ միայն բանակից վերցված միջոցների, բանակի ոչ լիարժեք սպառազինվածության համար: Հետևաբար, գեներալները իրենց անունը մաքրելու, իրենց անմեղությունն ապացուցելու համար պետք է հենց այդ պահանջները ներկայացնեին: Ստացվում է, որ նրանց չի հետաքրքրում, որ բազմաթիվ հրապարակումներ են արվում միլիոնատեր գեներալների մասին, որ մեղադրանքներ էին հնչում պատերազմի ընթացքում իրենց պատասխանատվության հատվածներում տեղի ունեցածի մասին: Փոխարենը, իրենց հետաքրքիր է, որ գործող իշխանությունները, որոնք իրենց վարքագծով տարբերվում են նախորդ բոլոր իշխանություններից, պետք է հեռանան: Ստացվում է, որ իրենց միայն այդ իշխանությունն է հետաքրքրում: Սա ուղղակի մտածելու տեղիք է տալիս, և անկախ նրանց վաստակից, որը երբևէ ունեցել են Հայաստանի պաշտպանության մեջ, թույլ է տալիս հետևություններ անել, որ սկսած հրապարակի ընդդիմախոսներից, վերջացրած իրենցով, ուղղակի իրենց պետք է իշխանությունը՝ խուսափելու համար ճշմարտության բացահայտումից:
– Կարելի՞ է արձանագրել, որ մեղադրելով վարչապետին ու այս իշխանությանը՝ նրանք բանակում առկա իրավիճակի ողջ պատասխանատվությունը փորձում են թողնել այս իշխանության վրա, և մեղքի իրենց բաժինը չեն զգում:
– Այսօր մեր բանակը թուլացված է, բայց ոչ բարոյալքված: Թե ով ինչ մեղքի բաժին ունի այդտեղ, դա պետք է պարզել ու պատասխանատվության կանչել: Այսինքն` կրկին վերադառնանք առանցքային հարցին: Եթե անգամ նրանք գտնում են, որ բանակը բարոյալքվել է, որ ռազմաքաղաքական ղեկավարությունը դրա համար պատասխանատվություն է կրում, և եթե նրանց այդ կոչերը զուգորդված են դավաճանության մեղադրանքներով, ապա պետք է կամ ապացուցեն, որ դավաճանություն է տեղի ունեցել պատերազմի ընթացքում, և ովքեր են այդ դավաճանները, և այդ դավաճանները պատասխանատվության ենթարկվեն՝ կլինի Նիկոլ Փաշինյանը, թե կլինեն իրենք: Այս պահանջը պետք է հնչեր նրանց շուրթերից: Եթե անգամ այսօր հնչում են այդ ամենի համար պատասխանատուների անուններ, ապա իրենց անունները նույնպես դրանց մեջ կան: Այդ մեղադրանքների լուծումը ոչ գործող իշխանության, ոչ Նիկոլ Փաշինյանի, ոչ էլ իրենց պարագայում դրանք շրջանցելը չէ, այլ այդ մեղադրանքների շուրջ, այսպես ասած, ճշմարտության բացահայտումն է: Դրանից հետո ժողովուրդն իր հետևությունը կանի, թե ով է դավաճան, ով է պատասխանատու:
– Այդ գեներալներից շատերը նաև քրեական գործերով են անցնում:
-Այո՛, նրանցից շատերն անցնում են տարբեր քրեական գործերով:
