Грузия Online-ի փոխանցմամբ՝ Վրաստանի խորհրդարանը չի պատրաստվում օրինականացնել մարիխուանայի օգտագործումը։ Այս մասին լրագրողներին հայտարարել է Վրաստանի խորհրդարանի փոխխոսնակ Գիգի Ծերեթելին.
«Մարիխուանայի գործածման օրինականացման վերաբերյալ որևէ քննարկում չկա։ Մենք աշխատանքներ ենք տանում ընդհանուր հակաթմրանյութային քաղաքականության վրա, որը համահունչ կլինի մեր իրողությանն ու միջազգային չափորոշիչներին։
Խոսքը միայն օրենսդիր մակարդակով համակարգային փոփոխությունների մասին է։ Դրանք ենթադրում են խորհրդատվական, վերականգնողական և բուժման միջոցների ուժեղացում, ապա նաև ապակրիմինալացնող քայլեր։ Այստեղ որևէ խոսք չկա օրինականացման մասին։
Հետագայում հնարավոր է՝ խոսք գնա քրեական պատասխանատվությունը տուգանքներով փոխելու մասին։ Սակայն այդ հարցում էլ մենք դեռ գտնվում ենք քննարկման փուլում»։
Հիշեցնենք, որ սրանից առաջ վրացական «Ալիա» թերթը, վկայակոչելով իր աղբյուրներին, տեղեկատվություն էր տարածել առ այն, թե իբր կառավարությունը պատրաստվում է տուրիստական գոտիներում միայն օտարազգիների համար օրինականացնել մարիխուանայի գործածումը, ինչը միտված է լինելու զբոսշրջիկների թիվն ավելացնելուն։
