Երրորդ օրն է, ինչ Շուշիի շրջանի Հին Շեն գյուղը ադրբեջանական շրջափակման մեջ է հայտնվել։ Ադրբեջանական կողմը շարունակում է զինվորականներին տեղակայել իր դրած պոստում։ Հին Շենի գյուղապետ Սամվել Սարգսյանը «Առաջին լրատվական»-ի հետ զրույցում նշեց, որ թեև ռուս խաղաղապահները եկել են և բանակցում են ադրբեջանական կողմի հետ, սակայն զրո արդյունք։
«Զրո արդյունք բանակցություններից, գյուղը նույն վիճակում է, ինչ երեկ։ Նույն իրավիճակն է, որևէ փոփոխություն չկա, իրենք էլ են պոստ դրել, և ադրբեջանցիների թիվը շարունակում է կամաց-կամաց մեծանալ»,- ասաց Հին Շենի գյուղապետը։
Նա նշեց, որ Հին Շենից որևէ մեկը չի ուզում դուրս գալ, չեն դավաճանում իրենց հողին ու ջրին։
Իշխանություններից որևէ պատասխան չկա այն մասին, թե ինչ քայլեր են ձեռնարկվում, գյուղապետի խոսքով՝ քննարկում են, Հայաստանի վարչապետը պետք է խառնվի այդ գործին, դեռ որևէ տեղաշարժ չկա: «Հրավիրում եմ այստեղ, եկեք տեղում ծանոթացեք իրավիճակին։ Ադրբեջանցիները տեղում բախումներ չեն հրահրում, բայց հոգեբանորեն են ուզում ճնշած լինել, որ ինքնակամ լքենք, գյուղն էլ ազատվի, իրենց պրեզիդենտն ա ասել, որ պետք է այդ տարածքը առանց բնակչի, բայց մենք չենք ճնշվում»,- ասաց գյուղապետը։
Հին Շենի բնակչության վաթսուն տոկոսը դեռ գյուղում է, իսկ նրանք, որոնք դուրս են գալիս, տեղակայվում են Տեղ գյուղում, Վայոց ձորում, Արարատում, Երևանում, մինչև Վրաստանի սահմանը։
«Պատերազմի օրերին մեկը չի բացակայել գյուղից, հիմա էլ այնպես չէ, որ բացակայել են, միայն ծեր ու մանուկ ենք հանել գյուղից»,- նշեց Սամվել Սարգսյանը։
Շուշիի քաղաքապետ Արծվիկ Սարգսյանն էլ «Առաջին լրատվական»-ի հետ զրույցում նշեց, որ եթե ադրբեջանցիները Հին Շենում մնան, կվտանգեն Հայաստանի սահմանը։ Նա նշեց, որ ինչ-որ խաղ է գնում, ինչն անհասկանալի է, անթույլատրելի է ադրբեջանական «պոստի» առկայությունը Հին Շենում։
