«Առաջին լրատվական»-ի զրուցակիցն է Գորիսի քաղաքապետ ը:
– Պարոն Առուշանյան, Սյունիքի մարզպետը վստահեցնում է, որ մարզի սահմաններին իրավիճակը հանգիստ է, և երեկ Դավիթ-Բեկի ուղղությամբ ձախ թևում և Ներքին Խնձորեսկից դեպի աջ առաջնագծից հակառակորդը բարձրախոսով ասել է՝ հետ գնացեք ձեր վարչական տարածքները մինչև այսինչ ժամը: Հիմա ի՞նչ իրավիճակ է։
– Մարզպետը ներկայացրել է իրավիճակը։ Ես հիմա էլ այդ նույն տեղն եմ, սահմանի վրա կանգնած եմ, որևէ խնդիր չկա։ Եթե թշնամին կցանկանա խնդիր ունենալ, պատրաստ ենք։ Իսկ երեկ թշնամին եկել բարձրախոսով հայտարարություններ է արել, մենք, սակայն, այստեղ կանգնած ենք, թեև պատերազմն ավարտվել է։ Այս պահին որևէ խնդիր չկա, գուցե հաջորդ պահին լինի, չգիտեմ…
– Դուք նշել եք, որ կառավարությունից որևէ ներկայացուցչի այդպես էլ չհետաքրքրեց Սյունիքը, որ որևէ մեկն այդպես էլ չեկավ։ Ձեր հայտարարությունից հետո որևէ բան փոխվե՞լ է, հնարավոր է՝ որոշել են գա՞լ։
– Երևանից մեր իշխանավորներից որևէ մեկը գա՞ այստեղ, ոչ, չկա նման բան, նույնն է։
– Այսինքն՝ անտարբերություն է։
– Իհարկե, հարցի մյուս կողմն էլ այն է, թե եթե, ասենք, գան իշխանավորները, ի՞նչ պետք է անեն, մի փամփուշտի ձեն լսեն ու շաքար ստանան, վատանա՞ն։
– Սյունիքի մարզը նոր մարզպետ ունի, ինչպե՞ս եք համագործակցում։
– Նոր մարզպետը իմ մանկության ընկերոջ հայրն է, իմ ընկերն է, միասին էինք պատերազմի դաշտում, ինքն իմ հրամանատարն էր, և մենք քավոր-սանիկ ենք։ Մի խոսքով, շատ լավ հարաբերություններ են։
– Շարունակո՞ւմ եք կառավարության, վարչապետի հրաժարականի պահանջ ներկայացնել։
– Իհարկե, ամեն դեպքում մենք կառավարություն, որպես էդպիսին, չեմ ֆիքսում, թե ունենք։ Այս կառավարությունը րոպե շուտ պետք է հրաժարական տա։ Եվ որքան ուշացավ, այնքան մեր երկրի համար վտանգավոր է, ամեն հաջորդ օր նրանց մնալը նախորդ օրվա համեմատ ավելի վտանգավոր է։
– Կարծում եք՝ այսօր այդպիսի հանրային պահանջ կա՞։
– Որքանով ես եմ շփվում բոլորի հետ, ես միայն դա եմ լսում։
– Առհասարակ կա՞ խուճապ՝ հաշվի առնելով, որ երկու օր առաջ թշնամին նոր հարձակման էր անցել, քանի որ, ինչպես նշվեց ավելի ուշ, այդ պահին այդ հատվածում ռուս խաղաղապահներ չէին եղել։
– Խուճապ չկա՝ իմ սուբյեկտիվ կարծիքով:
