Վրաստանի մասնակցությունը Ռուսաստանի հետ ցանկացած համատեղ ձևաչափում անհնար է, «քանի դեռ Ռուսաստանի Դաշնությունը չի կատարել իր միջազգային պարտավորությունները»: Այս մասին հայտարարել է Վրաստանի արտաքին գործերի փոխնախարար Լաշա Դարսալիան՝ ի պատասխան տարածաշրջանում «վեցյակի հարթակ» ստեղծելու նախաձեռնության:
Ավելի վաղ Թուրքիայի նախագահ Ռեջեփ Թայիփ Էրդողանը Բաքվում կայացած մամուլի ասուլիսում հայտարարել էր, որ Ադրբեջանի ղեկավար Իլհամ Ալիևի հետ համատեղ քննարկում են համագործակցության զարգացման նպատակով Հարավային Կովկասի տարածաշրջանում «վեցյակի հարթակ» ստեղծելու հարցը: Նա նշել է, որ հարթակում կարող են լինել Թուրքիան, Ադրբեջանը, Ռուսաստանը, Իրանը, Վրաստանը և, «ցանկության դեպքում»՝ Հայաստանը:
Դարսալիան նշել է, որ Վրաստանն արդեն մասնակցում է Թուրքիայի և Ադրբեջանի հետ համագործակցության տարբեր տարածաշրջանային ձևաչափերի, և երկրում հասկանում են «գործընկերներին և բարեկամ երկրներին»՝ Հարավային Կովկասում կայունությունն ու խաղաղությունը խթանելուն ուղղված քայլերի հարցում:
«Ձևաչափերի առկայության համար, որտեղ Ռուսաստանը նույնպես ընդգրկված կլինի, անհրաժեշտ է, որ նա կատարի իր միջազգային պարտավորությունները, ինչը ենթադրում է առնվազն հրադադարի ռեժիմի պարտավորության կատարում, զորքերի դուրսբերում Վրաստանի տարածքից, փախստականների վերադարձի գործընթացի սկիզբ և այլն», – նշել է Դարսալիան:
