Բրիտանական The Financial Times-ին տված հարցազրույցում Լեհաստանի արտաքին գործերի նախարար Ռադոսլավ Սիկորսկին կոչ է արել Բելառուսի նախագահ Ալեքսանդր Լուկաշենկոյին բանակցություններ սկսել՝ իշխանությունը հանձնելու համար:
«Մենք կարծում ենք, որ «Արևելյան գործընկերության» պայմաններն ու առավելությունները կլինեն ի նպաստ բելառուսական ժողովրդի: Բելառուսի տնտեսական դժվարությունների և քաղաքական մեկուսացման պատճառը «Լուկոնոմիկայի» համակարգում և քաղաքական դաշտում է: Այդ պատճառով ես կարծում եմ, որ պարոն Լուկաշենկոյի հետ քննարկման թեմա կարող է լինել Բելառուսի անցումը ժողովրդավարությանը և նրա հեռացումն իշխանությունից: Նրա համար ավելի լավ կլիներ, որպեսզի սովորի ոչ թե Մուբարաքից կամ Քադաֆիից, այլ օրինակ վերցնի Լեհաստանի գեներալ Յարուզելսկուց (որը հեռացել է իշխանությունից 1989 թ.- 1in.am)»,- ասել է Սիկորսկին, որը գտնվում է Լոնդոնում:
Սիկորսկին հավելել է, որ Եվրամիությունը ճիշտ է գործել՝ չհանելով Բելառուսն «Արևելյան գործընկերության» ծրագրից, չնայած այնտեղ տեղի ունեցած հետընտրական բռնություններին: Նա նաև ասել է, որ Լուկաշենկո չպետք է աֆրիկյան առաջնորդների պես կառչի իր աթոռից:
