ՀԱԿ համակարգող Լևոն Զուրաբյանը ևս շնորհավորելով Կոնգրեսի երեքամյակը՝ նշեց, որ Կոնգրեսի և ժողովրդի համարձակության ու տոկունության շնորհիվ քայլ առ քայլ իրականացվում են իրենց բոլոր նպատակները. «Վերականգնվեց երթերի ու հանրահավաքների իրավունքը, ազատվեցին քաղբանտարկյալները, ազատվեց Ազատության հրապարակը, նստեցրինք իշխանություններին բանակցությունների սեղան՝ Հայաստանի ժողովրդավարացման օրակարգով: Երկխոսությունը մեծ հաղթանակ է: Ժողովրդավարացման հաստատումը դարձել է ամիսների հարց»:
Զուրաբյանը հանրահավաքի մասնակիցներին ներկայացրեց երկխոսության մանրամասները՝ նշելով, որ երկխոսության երկու «ռաունդներում» իրենք երկու կարևոր նվաճում են արձանագրել` իշխանության պատվիրակությունը ներկայացնում է Սերժ Սարգսյանին, բանակցություններում պաշտոնապես ընդունվեց արտահերթ նախագահական և խորհրդարանական ընտրությունների անցկացմամբ լեգիտիմ իշխանությունների ձևավորման հարցը: Զուրաբյանի գնահատմամբ՝ իշխանությունն այժմ կանգնած է երկընտրանքի առջև. «Կամ սթափ կգնահատեն իրավիճակը և հիմա կգնան զիջումների, կամ էլ իրենց հատուկ կարճատեսությամբ կորոշեն զիջումների գնալ երբ փաստացի, կամ իրենց լեզվով ասած՝ նաղդով տեսնեն փողոցներում Կոնգրեսի կողմից մոբիլիզացված տասնյակ հազարավոր քաղաքացիների»:
Զուրաբյանը համոզված է, որ իշխանությունը կընտրի երկրորդ տարբերակը և կսպասի ժողովրդի սեպտեմբերյան ակտիվացմանն ու նոր աշնանը կընդունի որոշում. «Ես միայն մի խորհուրդ ունեմ այս իշխանությանը՝ մի խաղացեք այս ժողովրդի համբերության հետ, լուծեք բոլոր խնդիրները երկխոսության շրջանում, եթե չեք ուզում աշնանը տեսնել ժողովրդի ընդվզման այնպիսի ալիք, որի նմանը դեռ չեք տեսել: Այնպես մի արեք, որ երբ պատրաստ լինեք գնալ զիջումների, ձեր զիջումների կարիքը ոչ մեկը չունենա»:
Վերջում Զուրաբյանը բոլորին սեպտեմբերին հաղթանակ մաղթեց:
