Երևան քաղաքի հասարակական տրանսպորտի նոր երթուղային ցանցն արդեն բավականին երկար ժամանակ մշակման և վերամշակման փուլում է: Քաղաքապետարանը խոստացել է առաջիկայում այն քննարկման ներկայացնել:
«Առաջին լրատվականի» հետ զրույցում Հայաստանի Սպառողների ասոցիացիայի նախագահ Արմեն Պողոսյանը հայտարարեց, որ իրենք խիստ վրդովված են.
«Հուլիսի 26-ին ուղարկել ենք բաց նամակ ՀՀ վարչապետին, որ մեզ տեղյակ պահեն և մասնակից դարձնեն ցանցի մշակմանը: Դա Օրհուսի կոնվենցիայի հիմնական պահանջներից մեկն է, որ որոշումների կայացման բոլոր փուլերում հասարակությունը տեղյակ պահվի: Մեկ ամիս անց պատասխան ենք ստացել, բայց ոչ մի հարցը բովանդակային պատասխան չի պարունակում»:
Ա.Պողոսյանը հայտնեց, որ տրանսպորտային նոր ցանցին ծանոթանալու նպատակով անցյալ տարվա դեկտեմբերից քայլեր են ձեռնարկում, սակայն ապարդյուն, իսկ դա նշանակում է, որ խախտվում է Օրհուսի կոնվենցիան. «Նախկին քաղաքապետի ժամանակ նույն վիճակն էր, նույն քննարկումներն էին, և ի՞նչ»:
Ա.Պողոսյանի խոսքով, նոր ցանցը երթուղիների ուղեգիծն է, մեքենաների թիվը, ինտենսիվությունը և այլն: Սպառողների շահերի պաշտպանն ակնկալում է, որ այդ ցանցում առնվազն 50%-ով պետք է կրճատվի միկրոավտոբուսների քանակը, և դա լրացվի մեծ տեղատարողությամբ մեքենաներով:
Սակայն, ըստ նրա, ամենացավալին այն է, որ տրանսպորտային ցանցի վերաբերյալ այդ ծրագրերը չեն նախատեսում էլեկտրատրանսպորտի առաջանցիկ զարգացում, հետևաբար՝ պիտանի չեն. «Ես առավել քան համոզված եմ, որ այդ մշակված սխեմայում դա չկա: Տրամվայն անվերադարձ կորցրել ենք, տրոլեյբուսը հոգեվարքային վիճակում է, իսկ Երևանի մետրոն եզակի է ողջ աշխարհում, որ վերջին 26 տարում անգամ մեկ մետր նոր գիծ չի կառուցվել»:
