«Արցախի ճանաչման վերաբերյալ Ֆրանսիայի սենատի որոշումով Ֆրանսիան մարդու իրավունքների դրոշն է բարձրացնում և իր իսկական տեղն է ուզում զբաղեցնել որպես դեմոկրատիայի, համերաշխության և ազատության դրոշակակիր: Ֆրանսիայի ժողովրդին դա պետք էր: Ճգնաժամերից հետո Ֆրանսիան հաղթանակի կարիք էր զգում, և ինքն իրեն նվեր մատուցեց և հանդես եկավ բավականին լավ նախաձեռնությամբ՝ պաշտպանելով անարդարացիորեն հալածված հեռավոր մի ժողովրդի՝ Շարլ Ազնավուրի համաերկրացիներին: Բացի դրանից՝ Ֆրանսիան որպես ՄԱԿ-ի Անվտանգության խորհրդի մշտական անդամ և միջուկային երկիր, ինչպես նաև որպես Մինսկի խմբի համանախագահ պարտավոր էր միջամտել բարբարոսությունը կանխելու համար»,- այս մասին «Առաջին լրատվական»-ի հետ զրույցում ասաց Գերագույն խորհրդի նախկին պատգամավոր Ազատ Արշակյանը:
Նրա խոսքով՝ Ֆրանսիայի քայլը միջազգային իրավունքի տեսակետից ճիշտ էր: «Ֆրանսիան մեզ աջակցեց, աղետի օրերին նա մեզ հետ էր և ցույց տվեց, որ մենակ չենք»,- նշեց Արշակյանը:
«Հանուն հանրապետության» ԺՊԴԿ անդամ Հայկ Այվազյանը բացառեց, որ Ֆրանսիայի կառավարությունը կվերահաստատի այդ բանաձևը. «Դրա արդյունքում լուրջ հիմքեր կլինեն, որպեսզի Ֆրանսիան այլևս որպես Մինսկի խմբի համանախագահ երկիր չհամարվի, քանի որ այդ քայլը կդիտարկվի որպես կողմնակալ վերաբերմունքի արտահայտություն»:
Նրա կարծիքով՝ այս քայլով Ֆրանսիան ուզում է իր դեմքը փրկել. «Առաջինը՝ անգործության համար, քանի որ ուժի չկիրառման սկզբունքը խախտվեց ագրեսիվ կերպով, այլ երկրի միջամտությամբ, և նույն կերպ էլ կանգնեցվեծ դրա առաջխաղացումը. այս հայտարարության ընդունումը մի կողմ է դրել Մինսկի խմբին և միջազգային հանրությանը: Այս քայլով Ֆրանսիան փորձում է ընդդիմանալ Թուրքիային և Ռուսաստանին: Այս պահին արձագանքելու հերթն ԱՄՆ-ին է»:
Հայկ Այվազյանի դիտարկմամբ՝ այս քայլը Հայաստանի հնարավորությունների դաշտը դիվանագիտական խաղի տեսանկյունից ընդլայնում է. «Գործընթացը պետք է տեղափոխվի Մինսկի խմբի ձևաչափի տիրույթ»:
«Ֆրանսիայի քայլը պետք է դիտարկել, որպես ԵՄ-ում արված քայլ, սա մեզ մեծ շանս է տալիս. համահայկական մոբիլիզացիա պետք է սկսել, Քարդաշյանից սկսած, մեր բոլոր ռեսուրսները պետք է մոբիլիզացնենք և նախապատրաստվենք՝ այդ թվում նաև զենքով հայրենիքը պաշտպանելու. գալու է պահը, երբ որ Թուրքիան ու Ադրբեջանը կթուլանան, մեր շահերը պիտի կարողանանք պաշտպանել և մեր արդարացի իղձերը իրականացնել»,- նշեց Ազատ Արշակյանը:
Մանրամասները՝ տեսանյութում: