Արմավիրի թեմի սոցիալապես անապահով ընտանիքների 9-13 տարեկան երեխաների ամառային հանգստի ծրագիրը այս տարի մեկնարկվեց ս/թ հունիսի 1-ից և ավարտվելու է ս/թ օգոստոսի 3-ին: Թեմի առաջնորդ Տեր Սիոն եպիսկոպոս Ադամյանի օրհնությամբ, ծրագրի գլխավոր բարերար «Բաց Հասարակության ինստիտուտի օժանդակության հիմնադրամ հայկական մասնաճյուղի», ինչպես նաև աջակցությամբ ԱՄՆ Արևելյան և Արևմտյան թեմերի, բարերարներ Վահան Ավագյանի և Կարեն Հովհաննսիյանի, Հանքավանի «Լուսաբաց» ճամբարում իրականացվեց երկու հերթափոխով 113 երեխաների ամառային հանգիստ:
Հիմնականում գյուղերում բացակայում են հոգևոր-մաշակութային, կրթա-դաստիարակչական, մարզական և այլ հաստատությունները, գյուղական ընտանիքներում ծնողներն էլ գերազանցապես զբաղված են լինում գյուղատնտեսական աշխատանքներով, իրենց ընտանիքների օրվա հացի վաստակման խնդրի լուծման արդյունքում անուշադրության են մատնվում երեխաները, ուստի առավել կարևոր է գյուղի երեխաներին ուշադրության կենտրոնում պահել, նրանց համար բազմաթիվ ու տարաբնույթ կրթական, մշակութային միջոցառումներ կազմակերպել:
Այս տարվա «Արմավիրի մարզի անապահով ընտանիքների երեխաների 2011 թվականի ամառային հանգստի կազմակերպան մասին» ծրագրի շրջանակներում թեմի առաջնորդի նախագահությամբ կազմված հանձնաժողովը հանդիպումներ ունեցավ թեմի՝ Աղավնատուն, Շահումյան, Մարգարա, Երասխահուն, Արգավանդ, Փշատավան, Քարակերտ, համայնքների համայնքապետարաններում անապահով և զոհված ազատամարտիկների, ինչպես նաև Էջմիածնի և Մեծամորի Զանգակատուն ԲՀԿ-ի անապահով ընտանիքների երեխաների ծնողների հետ: Վերջիններս իերնց գոհունակությունը և շնորհակալությունը հայտնեցին նման նախաձեռնությանը աջակցող բոլոր կազմակերպություններին, որ իրենց երեխաները առիթ կունենան գտնվելու ճամբարում:
Հիմնական խնդիրն ու նպատակն է, հանգստի շրջանակներում ապահովել կարիքավոր երեխաներին լիարժեք սնունդով, նպաստել նրանց բարոյահոգեբանական վիճակի բարելավմանը, իրականացնել բազմաթիվ սոցիալական, կրթադաստիարակչական, հոգևոր-մշակութային, մարզամշակութային միջոցառումներ:
Արմավիրի թեմում մի քանի տարիների ընթացքում կազմակերպված ճամբարների փորձը ցույց է տալիս, որ այդ կարճ ժամանակահատվածում երեխաները ստանում են բավարար դաստիարակություն, շփվում են իրենց հասակակիցների հետ՝ տարբեր շրջաններից, սովորում են ճիշտ սնվել, վարել առողջ ապրելակերպ, այցելում են պատմամշակութային վայրեր, սովորում են սիրել ու պահպանել շրջակա միջավայրը: Թեմի հոգևոր սպասավորները ճամբարում երեխաներին ծանոթացնում են Հայ Եկեղեցու պատմությանը, սովորեցնում աղոթքներ, հոգևոր երգեր, տալիս քրիստոնեական դաստիարակություն:
Առաջնորդարան Արմավիրի թեմի
